ৰাজ্যৰ বান পৰিস্থিতিক লৈ দিল্লীত অসমৰ সাংসদসকলেৰে বৈঠকত বহিল প্ৰধানমন্ত্ৰী মোদী

ৰাজ্যৰ বিভীষিকাময় বান পৰিস্থিতিৰ সম্পূৰ্ণ উদ্বিগ্নতা প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে । মঙলবাৰে সংসদ ভৱনৰ চৌহদত অসমৰ বান পৰিস্থিতিক লৈ এক জৰুৰী বৈঠকত বহিল প্ৰধানমন্ত্ৰী মোদী । বৈঠকত ৰাজ্যৰ বানপীড়িত ৰাইজৰ সহায়-সহাৰ্যৰ বাবে ৰাজ্যৰ চৰকাৰৰ সৈতে নিৰন্তৰ কাম কৰি আছে বুলি আশ্বাস প্ৰদান কৰে ।

মঙলবাৰে সংসদ ভৱনত অসমৰ কেন্দ্ৰীয় মন্ত্ৰী আৰু বিজেপিৰ সাংসদসকলক সাক্ষাৎ কৰি প্ৰধানমন্ত্ৰীগৰাকীয়ে পৰিস্থিতিৰ বিতং বুজ লয় । বৈঠকৰ পিছতে ছ’চিয়েল মিডিয়া ‘এক্স’ (টুইটাৰ)-ত পোষ্ট কৰি প্ৰধানমন্ত্ৰীয়ে কয় যে কেন্দ্ৰীয় চৰকাৰে অসম চৰকাৰৰ সৈতে কান্ধত কান্ধ মিলাই কাম কৰি আছে । ক্ষতিগ্ৰস্ত লোকসকলক সকলো ধৰণৰ সহায় কৰিবলৈ কেন্দ্ৰ প্ৰতিশ্ৰুতিবদ্ধ আৰু তেওঁ সকলোৰে কুশল প্ৰাৰ্থনা কৰে ।

এই গুৰুত্বপূৰ্ণ বৈঠকত সাংসদসকলৰ সৈতে উপস্থিত আছিল কেন্দ্ৰীয় মন্ত্ৰী সৰ্বানন্দ সোণোৱাল আৰু বৈদেশিক পৰিক্ৰমা ৰাজ্যিক মন্ত্ৰী পবিত্ৰ মাৰ্ঘেৰিটা ।

মুখ্যমন্ত্ৰী হিমন্ত বিশ্ব শৰ্মাৰ প্ৰতিক্ৰিয়া:

প্ৰধানমন্ত্ৰীৰ এই তৎপৰতাক লৈ সামাজিক মাধ্যমত ধন্যবাদ জ্ঞাপন কৰে মুখ্যমন্ত্ৰী ড০ হিমন্ত বিশ্ব শৰ্মাই । তেওঁ জনায় যে প্ৰধানমন্ত্ৰী মোদীয়ে নিজেই সমগ্ৰ পৰিস্থিতিৰ ওপৰত চকু ৰাখিছে ।

বৰ্তমান ৰাজ্য চৰকাৰে বানাক্ৰান্ত লোকসকলৰ সহায়-সহাৰ্যৰ আৰু পুৰ্বাসনৰ বাবে ‘যুদ্ধকালীন ক্ষিপ্ৰতাৰে’ কাম কৰি থকা বুলি মুখ্যমন্ত্ৰীয়ে স্পষ্ট কৰি দিয়ে ।

মুখ্যমন্ত্ৰীগৰাকীয়ে কয় যে, প্ৰত্যেকখন বানাক্ৰান্ত গাঁৱলৈ সাহায্যকাৰী দলসমূহ প্ৰৱেশ কৰিছে । যিবোৰ অঞ্চলত পানীৰ বাবে বিদ্যুৎ সেৱা ব্যাহত হৈছিল, বেছিভাগ ঠাইতে যোগান পুনৰ আৰম্ভ কৰা হৈছে ।

ইফালে বানাক্ৰান্ত লোকসকলক আশ্ৰয় শিৱিৰত ৰাখি খাদ্য আৰু চিকিৎসাৰ ব্যৱস্থা কৰা হৈছে । শিশুসকলৰ বাবে শিৱিৰসমূহত বিশেষ ব্যৱস্থা গ্ৰহণ কৰা হৈছে বুলিও তেওঁ উল্লেখ কৰে ।

লগতে পঢ়ক : উজনিৰ বানপীড়িত বাবে ডাঙৰ পদক্ষেপ, ১২৬ গৰাকী বিধায়কে আগবঢ়াব এমাহৰ দৰমহা