প্ৰলয়ংকাৰী বান: কেইবাখনো দূৰণিবটীয়া ৰে’ল বাতিল
উজনি অসমত হোৱা প্ৰলয়ংকাৰী বানৰ ফলত উত্তৰ-পূব সীমান্ত ৰে’লৱেই (NFR) কেইবাখনো যাত্ৰীবাহী আৰু দূৰণিবটীয়া ৰে’ল বাতিল কৰিছে।
শিৱসাগৰ জিলাৰ শিমলুগুৰিত সৃষ্টি হোৱা ভয়াৱহ বানপানীৰ ফলত ৰে’ল সেৱাত ব্যাঘাত জন্মাত উত্তৰ-পূব সীমান্ত ৰে’লৱেই (NFR) কেইবাখনো যাত্ৰীবাহী ৰে’ল বাতিল, পথ পৰিৱৰ্তন আৰু হ্ৰাস কৰিছে।
২৩ জুলাইত প্ৰকাশ কৰা এক চৰকাৰী বিজ্ঞপ্তিমতে, উজনিত ধাৰাবাহিকভাৱে হৈ থকা বৰষুণৰ বাবে দিখৌ নদীৰ পানী উপচি পৰে। ইয়াৰ ফলত তিনিচুকীয়া সংমণ্ডলৰ অন্তৰ্গত শিমলুগুৰি আৰু ইয়াৰ আশে-পাশে থকা ৰে’লপথ, ষ্টেচন চৌহদ তথা নিম্নাঞ্চলসমূহ পানীৰে প্লাবিত হৈছে। ৰে’লপথৰ ওপৰেৰে পানী বৈ যোৱাৰ বাবে পৰৱৰ্তী নিৰ্দেশ নিদিয়ালৈকে শিমলুগুৰি–নামতি আলি আৰু শিমলুগুৰি–চেলেংহাট অংশত ৰে’ল চলাচল স্থগিত ৰাখিবলৈ বাধ্য হৈছে। NFR-এ জনোৱা মতে, ৰে’ল সেৱা অতি সোনকালে স্বাভাৱিক কৰি তুলিবলৈ অভিযন্তা দল আৰু জ্যেষ্ঠ ৰে’ল বিষয়াসকলে ২৪ ঘণ্টাই পৰিস্থিতি নিৰীক্ষণ কৰি পুনৰুদ্ধাৰৰ কাম চলাই আছে।
এই ব্যাহত পৰিস্থিতিৰ বাবে ডিব্ৰুগড় আৰু তিনিচুকীয়াৰ পৰা যাত্ৰা আৰম্ভ কৰা বা ডিব্ৰুগড় অভিমুখী কেইবাখনো দুৰণিবটীয়া ৰে’ল ৰঙিয়া–ৰাঙাপাৰা , উত্তৰ লখিমপুৰ–ডিব্ৰুগড় পথেৰে পৰিৱৰ্তন (divert) কৰা হৈছে। ইয়াৰ ভিতৰত ২২ জুলাইৰ পৰা ২৭ জুলাইৰ ভিতৰত চলাচল কৰিবলগীয়া ডিব্ৰুগড়–নতুন দিল্লী ৰাজধানী এক্সপ্ৰেছ, নিউ তিনিচুকীয়া–এছ.এম.ভি.টি. বেংগালুৰু বিবেক এক্সপ্ৰেছ, অৱধ অসম এক্সপ্ৰেছ, কামৰূপ এক্সপ্ৰেছ, লোকমান্য তিলক টাৰ্মিনাছ এক্সপ্ৰেছ, কন্যাকুমাৰী বিবেক এক্সপ্ৰেছ আৰু ৰাজেন্দ্ৰ নগৰ এক্সপ্ৰেছ আদি উল্লেখযোগ্য।
ঠিক একেদৰে, ডিব্ৰুগড় অভিমুখী আন কেইবাখনো ৰে’ল—যেনে হাওৰা–ডিব্ৰুগড় কামৰূপ এক্সপ্ৰেছ, লোকমান্য তিলক–ডিব্ৰুগড় এক্সপ্ৰেছ, কন্যাকুমাৰী–ডিব্ৰুগড় বিবেক এক্সপ্ৰেছ, নতুন দিল্লী–ডিব্ৰুগড় ৰাজধানী এক্সপ্ৰেছ আৰু অৱধ অসম এক্সপ্ৰেছ বিকল্প পথেৰে চলাচল কৰিবলৈ দিয়া হৈছে।
আনহাতে, ২৩ জুলাইৰ পৰা ২৭ জুলাইলৈ মৰিয়নীত নাগালেণ্ড এক্সপ্ৰেছৰ শ্বৰ্ট টাৰ্মিনেট আৰু শ্বৰ্ট অৰিজিনেট কৰা হৈছে।ফলস্বৰূপে এই সময়ছোৱাত মৰিয়নী আৰু ডিব্ৰুগড়ৰ মাজত সেৱা বাতিল হৈ থাকিব।
NFR-এ যাত্ৰাৰ পূৰ্বে যাত্ৰীসকলক ৰে’লৰ শেহতীয়া অৱস্থা পৰীক্ষা কৰিবলৈ পৰামৰ্শ দিছে আৰু পৰিস্থিতি উন্নত হোৱাৰ লগে লগে স্বাভাৱিক সেৱা পুনৰ আৰম্ভ কৰিবলৈ যুদ্ধকালীন ক্ষিপ্ৰতাৰে পুনৰুদ্ধাৰৰ কাম চলাই থকা বুলি জনায়।
লগতে পঢ়ক: এজাক বৰষুণ; পুনৰ কৃত্ৰিম বানৰ কবলত মহানগৰী