নতুন ৰাজনৈতিক দল গঠন কৰিয়েই মমতা বেনাৰ্জীক তীব্ৰ আক্ৰমণ চলায় হুমায়ুন কবীৰে । তেওঁ বিধানসভা নিৰ্বাচনত টি এম চিয়ে ১০০খন আসনো লাভ নকৰে বুলি দাবী কৰে ।

নিলম্বিত তৃণমূল কংগ্ৰেছৰ বিধায়ক হুমায়ুন কবীৰে বংগত গঠন কৰিলে নতুন ৰাজনৈতিক দল । সোমবাৰে বেলডাংগাত বিশাল ৰাজহুৱা সমাৱেশত কবীৰে আনুষ্ঠানিকভাৱে তেওঁৰ নতুন দল জনতা উন্নয়ন পাৰ্টি গঠনৰ কথা ঘোষণা কৰে ।

বাবৰি মছজিদৰ আৰ্হিত মছজিদৰ আধাৰশিলা স্থাপন কৰাৰ অভিযোগত নিলম্বিত হোৱা হুমায়ুন কবীৰে ২০২৬ চনৰ বিধানসভা নিৰ্বাচনত টি এম চিয়ে ১০০খন আসনো লাভ নকৰে বুলি দাবী কৰি মুখ্যমন্ত্ৰী মমতা বেনাৰ্জীক পোনপটীয়াকৈ প্ৰত্যাহ্বান জনায় । লগতে এইবাৰ মমতা বেনাৰ্জীয়ে চৰকাৰ গঠন কৰিব নোৱাৰে বুলি নিশ্চয়তা প্ৰদান কৰে হুমায়ুন কবীৰে ।

মুৰ্ছিদাবাদৰ দুখন আসন বেলদাংগা আৰু ৰাজনগৰৰ পৰা তেওঁ নিজে প্ৰতিদ্বন্দ্বিতা কৰিব বুলি ঘোষণা কৰে কবীৰে । তেওঁ মমতা বেনাৰ্জীক এতিয়া সাধাৰণ মানুহৰ পৰা আতৰ হৈ পৰিছে বুলি তীব্র আক্ৰমণ চলায় ।

কবীৰে মুৰ্ছিদাবাদ আসনৰ পৰা হিন্দু মহিলা প্ৰাৰ্থী মনীষা পাণ্ডে আৰু কলকাতাৰ বালিগুংগ আসনৰ পৰা নিশা চেটাৰ্জীক মনোনয়ন দিয়াৰ কথাও ঘোষণা কৰে, যাতে তেওঁলোকে ধৰ্মনিৰপেক্ষ ভাবমূৰ্তি দাঙি ধৰিব পাৰে । মুৰ্ছিদাবাদত বাবৰি মছজিদ সদৃশ মছজিদ নিৰ্মাণৰ কথা ঘোষণা কৰাৰ পিছতে যোৱা ৪ ডিচেম্বৰত টি এম চিয়ে নিলম্বন কৰিছিল কবীৰক । ৬ ডিচেম্বৰত তেওঁ ৰেজিনগৰত মছজিদৰ আধাৰশিলা স্থাপন কৰি বিতৰ্কক আৰু অধিক তীব্ৰতৰ কৰি তুলিছিল ।

লগতে পঢ়ক : মমতা বেনাৰ্জীৰ ভেটি কঁপাই পশ্চিমবংগত হুমায়ুন কবীৰৰ বৃহৎ ঘোষণা…

পশ্চিম বংগৰ ৰাজনীতি কঁপাই এক বৃহৎ ঘোষণা কৰিছে হুমায়ুন কবীৰে। সোমবাৰে পশ্চিম বংগৰ ৰাজনীতিত উন্মেষ ঘটিব পাৰে এটা নতুন দলে !

নিলম্বিত তৃণমূল কংগ্ৰেছ নেতা হুমায়ুন কবীৰে পশ্চিম বংগৰ ৰাজনীতি কঁপাই এক বৃহৎ ঘোষণা কৰিছে । নতুন দল গঠন কৰি ৰাজ্যৰ ২৯৪খন বিধানসভাৰ আটাইকেইখন আসনত প্ৰতিদ্বন্দ্বিতা কৰাৰ কথা ঘোষণা কৰিছে কবীৰে । লগতে নিজকে কিং মেকাৰৰ ভূমিকাতো দেখা পোৱা বুলি উল্লেখ কৰিছে হুমায়ুন কবীৰে ।

সোমবাৰে মুৰ্ছিদাবাদত আনুষ্ঠানিকভাৱে নিজৰ নতুন ৰাজনৈতিক দল খুলিবলৈ সাজু হৈছে হুমায়ুন কবীৰ । আনকি দল গঠনৰ পূৰ্বে তেওঁ স্পষ্টকৈ কৈছে যে তেওঁৰ দলে তৃণমূল কংগ্ৰেছৰ বিৰুদ্ধে সকলো আসনত প্ৰাৰ্থী প্ৰক্ষেপ কৰিব । তেওঁ এতিয়াও নিজৰ দলৰ নাম প্ৰকাশ নকৰিলেও এখন টেবুলকে ধৰি তিনিটা নিৰ্বাচনী প্ৰতীকৰ বাবে নিৰ্বাচন আয়োগক আবেদন জনাইছে ।

বিজেপি আৰু টি এম চিক জনাব প্ৰত্যাহ্বান-

কবীৰে কয় যে বংগত তেওঁৰ যুঁজখন বিজেপি আৰু টি এম চি দুয়োটা দলৰ বিৰুদ্ধে হ’ব । কংগ্ৰেছ, চি পি আই(এম), ওৱেইছিৰ দলৰ সৈতে মিত্ৰতাৰ সম্ভাৱনা নুই কৰিব নোৱাৰিও বুলিও তেওঁ ইংগিত দিছে ।

ইফালে, মুৰ্ছিদাবাদৰ বিভিন্ন স্থানত হুমায়ুন কবীৰৰ নতুন দলৰ বিজ্ঞাপনৰ পোষ্টাৰ ওলাবলৈ আৰম্ভ কৰিছে । মিৰ্জাপুৰ অঞ্চলত এক বৃহৎ অনুষ্ঠানৰ বাবেও মঞ্চ প্ৰস্তুত কৰা হৈছে, য’ত প্ৰায় চাৰি লাখ লোক সমবেত হ’ব পাৰে বুলি দাবী কৰা হৈছে ।

মুৰ্ছিদাবাদত ১০খন আসন লাভ কৰাৰ দাবী-

মুৰ্ছিদাবাদৰ ২২খন বিধানসভাৰ আসনৰ ভিতৰত কমেও ১০খন আসনত জয়ী হোৱাৰ দাবী কৰিছে হুমায়ুন কবীৰে । বৰ্তমান জিলাখনৰ ২২খন আসনৰ ভিতৰত ২০খন আসন টি এম চিৰ দখলত আছে আৰু বিজেপিৰ দখলত দুখন আসন আছে । উল্লেখ্য যে, অহা বছৰ পশ্চিম বংগত হ’বলগীয়া বিধানসভা নিৰ্বাচনৰ বাবে ৰাজনৈতিক দলসমূহ সাজু হৈছে ।

লগতে পঢ়ক : অসমত বাংলাদেশী অনুপ্ৰৱেশকাৰীক সংস্থাপন দিব বিচাৰিছে কংগ্ৰেছে… নামৰূপৰ জনসভাত কংগ্ৰেছক কটাক্ষ প্ৰধানমন্ত্ৰী মোদীৰ