সোণৰ খনিত ঘটিল ভয়ংকৰ অঘটন

ভেনিজুৱেলাৰ এল কালাওত হোৱা প্ৰচণ্ড বৰষুণৰ ফলত এটা সোণৰ খনিত ভয়ংকৰ দুৰ্ঘটনা সংঘটিত হৈছে । খনিটোত মাটি খহি পৰাত কমেও ১৪ জন লোকৰ মৃত্যু হৈছে । দেশখনৰ “কোৱাট্ৰ’ এস্কুনাছ ডি কেৰাটাল” সোণৰ খনিৰ তিনিটা ভিন্ন স্থানত এই দুৰ্ঘটনা সংঘটিত হয় ।

ঘটনাৰ পিছতে কৰ্তৃপক্ষই অনুসন্ধান আৰু উদ্ধাৰ অভিযানৰ বাবে কমাণ্ড পোষ্ট স্থাপন কৰে । বলিভাৰ ৰাজ্যৰ ক্ষতি মূল্যায়ন আৰু প্ৰয়োজনীয়তা বিশ্লেষণ কাৰ্য্যকৰী মণ্ডলৰ মুৰব্বী ব্ৰিগেডিয়াৰ জেনেৰেল গ্ৰেগৰী গনজালেজ আচেভেডোৰ নেতৃত্বত এই অভিযান চলোৱা হৈছে ।

খনিটোত আবদ্ধ হৈ থকা লোকসকলৰ সন্ধান আৰম্ভ কৰিবলৈ সকলো খাদৰ পৰা পানী পাম্প কৰি পানীৰ স্তৰ কমোৱা হয় আৰু তাৰ পিছত উদ্ধাৰ অভিযানৰ মূল্যায়ন কৰিব পৰা গৈছে । অৱশ্যে এই সন্দৰ্ভত অধিক সবিশেষ শ্বেয়াৰ কৰা নাই বিষয়াসকলে । ইলে কালাও অগ্নিনিৰ্বাপক বাহিনীয়ে ছ’চিয়েল মিডিয়াত শ্বেয়াৰ কৰা আন শ্ৰমিকৰ বক্তব্যৰ ভিত্তিত মৃত্যু হোৱা লোকৰ সংখ্যা নিৰ্ধাৰণ কৰিছে ।

উল্লেখ্য যে, ভেনিজুৱেলাত তাম, হীৰা আৰু অন্যান্য বহুমূলীয়া ধাতুৰ খনি আছে । কিন্তু এই খনিসমূহত কাম কৰাটো প্ৰায়ে বিপদজনক কাৰণ এই উদ্যোগ ভালদৰে নিয়ন্ত্ৰিত নহয় আৰু সুৰক্ষা ব্যৱস্থাৰ অভাৱ । স্থানীয় কৰ্তৃপক্ষ আৰু উদ্ধাৰকাৰী দলে জনোৱা মতে, আৱদ্ধ হৈ থকা সকলো শ্ৰমিকক বচাবলৈ আৰু ক্ষতিগ্ৰস্ত পৰিয়ালক সাহায্য প্ৰদানৰ বাবে কাম কৰি থকা হৈছে ।

লগতে পঢ়ক : পাকিস্তানত ভয়ংকৰ পৰিস্থিতি; TLPৰ প্ৰতিবাদকাৰী আৰু নিৰাপত্তাৰক্ষীৰ মাজত হিংসাত্মক সংঘৰ্ষ