ইথিওপিয়া ভ্ৰমণ সামৰি বুধবাৰে ওমানত উপস্থিত প্ৰধানমন্ত্ৰী মোদী । এই ভ্ৰমণ কালতে দুয়োখন দেশৰ মাজত এক অভিলাষী মুক্ত বাণিজ্য চুক্তি স্বাক্ষৰিত হ’ব ।

তিনিখন দেশৰ ভ্ৰমণৰ অন্তিম পৰ্য্যায়ত বুধবাৰে ওমানত উপস্থিত হয় প্ৰধানমন্ত্ৰী নৰেন্দ্ৰ মোদী । দুদিনীয়া এই ভ্ৰমণৰ সময়ত ওমানৰ শীৰ্ষ নেতৃত্বৰ সৈতে আলোচনাত মিলিত হ’ব মোদী । বৃহস্পতিবাৰে প্ৰধানমন্ত্ৰী মোদীৰ উপস্থিতিত দুয়োখন দেশৰ মাজত এক অভিলাষী মুক্ত বাণিজ্য চুক্তি স্বাক্ষৰিত হ’ব । মাস্কাটত উপস্থিত হোৱাৰ লগে লগে হোটেলত ভাৰতীয় মূলৰ লোকে প্ৰধানমন্ত্ৰী মোদীক উষ্ম আদৰণি জনায় ।

প্ৰধানমন্ত্ৰী মোদীক বিমানবন্দৰত উষ্ম আদৰণি জনায় ওমানৰ প্ৰতিৰক্ষা পৰিক্ৰমা বিভাগৰ উপ-প্ৰধানমন্ত্ৰী ছায়িদ শ্বিহাব বিন তাৰিক আল ছাইদে । তেওঁক গাৰ্ড অৱ অনাৰ প্ৰদান কৰা হয় । চুলতান হাইথাম বিন তাৰিকৰ আমন্ত্ৰণত ওমানত উপস্থিত হৈছে প্ৰধানমন্ত্ৰী মোদী । উপসাগৰীয় দেশখনলৈ তেওঁৰ এয়া দ্বিতীয়টো ভ্ৰমণ আৰু দুয়োখন দেশৰ মাজত কূটনৈতিক সম্পৰ্ক স্থাপনৰ ৭০ বছৰ সম্পূৰ্ণ হৈছে ।

ওমানত উপস্থিত হোৱাৰ পিছতে প্ৰধানমন্ত্ৰীয়ে এক্সত লিখিছে, “মাস্কাট বিমানবন্দৰত উষ্ম আদৰণি জনোৱাৰ বাবে ওমানৰ উপ-প্ৰধানমন্ত্ৰী (ৰক্ষা পৰিক্ৰমা) ছায়িদ শ্বিহাব বিন তাৰিক আল ছাইদক বহুত বহুত ধন্যবাদ । আমাৰ মাজত অতি ভাল কথা-বতৰা হৈছিল, য’ত আমি ভাৰত-ওমান বন্ধুত্বৰ বিষয়ে আমাৰ চিন্তাধাৰা ভাগ কৰো ।”

ভাৰত আৰু ওমানৰ মাজত হোৱা মুক্ত বাণিজ্য চুক্তিত যোৱা শুকুৰবাৰে কেন্দ্ৰীয় কেবিনেটে অনুমোদন জনাইছিল । আনুষ্ঠানিকভাৱে বিস্তৃত অৰ্থনৈতিক অংশীদাৰিত্ব চুক্তি নামেৰে নামাকৰণ কৰা এই চুক্তিৰ আলোচনা ২০২৩ চনৰ নৱেম্বৰ মাহৰ পৰা আনুষ্ঠানিকভাৱে আৰম্ভ হৈছিল আৰু এই বছৰতে সমাপ্ত হৈছিল । কৌশলগত অংশীদাৰিত্ব শক্তিশালী কৰাৰ লগতে শক্তিশালী বাণিজ্যিক আৰু অৰ্থনৈতিক সম্পৰ্ক গঢ়ি তোলাৰ বাবে ওমানৰ চুলতান তাৰিকৰ সৈতে আলোচনাত মিলিত হ’ব প্ৰধানমন্ত্ৰী নৰেন্দ্ৰ মোদী । প্ৰবাসী ভাৰতীয়ৰ এক সমাৱেশতো ভাষণ দিব তেওঁ ।

লগতে পঢ়ক : আমি বন্ধুত্বৰ নতুন অধ্যায় লিখিছো… ইথিওপিয়াৰ সংসদত প্ৰধানমন্ত্ৰী মোদীৰ সম্বোধন