৬২ বছৰৰ সেৱাৰ অন্তত বায়ুসেনাৰ পৰা মিগ ২১ৰ আনুষ্ঠানিক অৱসৰ

ভাৰতৰ প্ৰথমখন ছুপাৰছনিক বিমান মিগ ২১ এ শুকুৰবাৰে বায়ুসেনাৰ পৰা অৱসৰ লয় । ২৬ ছেপ্টেম্বৰত চণ্ডীগড় বায়ুসেনা ষ্টেচনত অনুষ্ঠিত হোৱা এক আৱেগিক বিদায় অনুষ্ঠানত প্ৰতিৰক্ষা মন্ত্ৰী ৰাজনাথ সিং, প্ৰতিৰক্ষা মুৰব্বী জেনেৰেল অনিল চৌহান, বায়ু প্ৰধান মাৰ্শ্বাল এ পি সিং, সেনা আৰু নৌসেনাৰ মুৰব্বী, ছজন প্ৰাক্তন বায়ুসেনাৰ মুৰব্বী, প্ৰবীণ সৈনিক আৰু তেওঁলোকৰ পৰিয়ালে অংশগ্ৰহণ কৰে । এই অনুষ্ঠান মিগ ২১ৰ বীৰত্বক চেলুট দিয়াৰ এক আৱেগিক মুহূৰ্ত আছিল ।

ৰাজনাথ সিঙে কয় যে মিগ-২১ ভাৰতৰ প্ৰতিৰক্ষাৰ ক্ষেত্ৰত আত্মনিৰ্ভৰশীলতাৰ সন্ধানত জীয়াই থাকিব । এই বিমানে সাহস, অনুশাসন আৰু দেশপ্ৰেমৰ অবিৰত মনোভাৱৰ প্ৰতীক, যিয়ে এল চি এ-তেজাছ আৰু আগন্তুক এডভান্সড মিডিয়াম কম্বেট এয়াৰক্ৰাফ্টৰ দৰে থলুৱা বিমান বিকাশৰ বাবে অনুপ্ৰাণিত কৰিব ।

৬২ বছৰ দেশক সেৱা আগবঢ়োৱা এই বিমানখন অপাৰেচন সিন্দুৰৰ সময়তো সম্পূৰ্ণ সতৰ্ক অৱস্থাত আছিল । আক্ৰমণৰ লগতে মিগ ২১ এ গোপন অভিযানটো বিশেষ ভূমিকা পালন কৰিছিল । হাজাৰ হাজাৰ ফুট উচ্চতাৰ পৰা লক্ষ্যস্থানত ক্ষেপণাস্ত্ৰ নিক্ষেপ কৰি তীব্ৰ বেগত অন্তৰ্ধান হোৱা এই যুদ্ধ বিমানখনে বহু গোপন অভিযান সফলতাৰে সম্পন্ন কৰিছে । ইয়াৰ ভিতৰত মিগ ২১ এ পাকিস্তানৰ স্কাৰডু উপত্যকাৰ পৰা কাৰ্গিল আৰু অপাৰেচন ব্লু ষ্টাৰলৈকে গুৰুত্বপূৰ্ণ ভূমিকা পালন কৰিছিল ।

মিগ ২১ ভাৰতৰ প্ৰথম ছুপাৰছনিক যুদ্ধ বিমান আছিল । ১৯৬৩ চনত ভাৰতীয় বায়ুসেনাত অন্তৰ্ভুক্ত কৰা হৈছিল এই বিমানক । ১৯৬০ আৰু ৭০ৰ দশকত এই বিমানখনে প্ৰযুক্তিগত উন্নতি লাভ কৰে । মিগ-২১ সকলো বতৰত কাম কৰিব পৰা আৰু বায়ুৰ পৰা মাটিলৈ আক্ৰমণ কৰিব পৰা বিভিন্ন ধৰণৰ অস্ত্ৰ কঢ়িয়াই নিব পৰাকৈ সক্ষম । উল্লেখ্য যে, মিগ-২১ এখন ৰাছিয়ান যুদ্ধ বিমান । ভাৰতে ৰাছিয়াৰ পৰা প্ৰায় দুশ কোটি টকা মূল্যত ক্ৰয় কৰিছিল । ভাৰতে ৮৭৪খন মিগ-২১ লাভ কৰিছিল, ইয়াৰে ৬০০খন ভাৰতত নিৰ্মিত হৈছিল ।

উল্লেখ্য যে, ১৯৬৩ চনত বায়ুসেনাত যোগদান কৰাৰ পিছত মিগ-২১ বিমানে ভাৰতৰ সামৰিক শক্তি সলনি কৰি দিয়ে । ১৯৬৫ চনৰ যুদ্ধত ই পাকিস্তানৰ বহু ঠাই ধ্বংস কৰিছিল । ১৯৭১ চনৰ যুদ্ধত ই ঢাকা গৱৰ্ণৰ হাউছত বোমা বৰ্ষণ কৰিছিল । ১৯৬৫ চনৰ যুদ্ধৰ পৰা অপাৰেচন সিন্দুৰলৈকে এই বিমানখন সদায় ৰাষ্ট্ৰ বাবে এক শক্তি হৈ আহিছে । ২০১৯ চনৰ বালাকোট আক্ৰমণৰ পিছত উইং কমাণ্ডাৰ অভিনন্দন বৰ্থমানে মিগ-২১ৰ সহায়তে পাকিস্তানী এফ-১৬ বিমান ধ্বংস কৰিছিল ।

কোনে ল’ব মিগ-২১ৰ ঠাই ?

প্ৰতিৰক্ষা মন্ত্ৰালয়ে হিন্দুস্তান এৰ’নটিক্স লিমিটেডৰ সৈতে ৬২,৩৭০ কোটি টকাৰ চুক্তিত স্বাক্ষৰ কৰি ৯৭খন তেজছ এম কে-১এ যুঁজাৰু বিমান ক্ৰয় কৰিছে । এই বিমানসমূহ ২০২৭-২৮ চনৰ পৰা বায়ুসেনাই লাভ কৰিবলৈ আৰম্ভ কৰিব । পুৰণি মিগ-২১ বিমানৰ ঠাই ল’ব তেজছ এম কে-১এ ।

লগতে পঢ়ক : মহাকাশতো বিফল হ’ব চীন-পাকিস্তানৰ কৌশল; ISRO এ নিয়োগ কৰিব মহাকাশৰ S400