মাইক্ৰ’ছফটে ভাৰতৰ এআই-ফাৰ্ষ্ট ভৱিষ্যত শক্তিশালী কৰাৰ বাবে দেশত ১৭.৫ বিলিয়ন ডলাৰৰ বৃহৎ বিনিয়োগৰ প্ৰতিশ্ৰুতি দিছে । আজি প্ৰধানমন্ত্ৰী মোদীক সাক্ষাৎ কৰে মাইক্ৰ’ছফ্টৰ অধ্যক্ষ সত্য নাডেলাই ।

ভাৰতৰ কৃত্ৰিম বুদ্ধিমত্তা (AI) বিপ্লৱক প্ৰসাৰিত কৰাৰ বাবে প্ৰধানমন্ত্ৰী মোদীৰ প্ৰচেষ্টাই এক বৃহৎ সফলতা লাভ কৰিছে । প্ৰযুক্তিৰ ক্ষেত্ৰৰ দিগ্গজ মাইক্ৰ’ছফটে ভাৰতৰ এআই-ফাৰ্ষ্ট ভৱিষ্যত শক্তিশালী কৰাৰ বাবে দেশত ১৭.৫ বিলিয়ন ডলাৰ (প্ৰায় ১,৪৫,০০০ কোটি)ৰ বৃহৎ বিনিয়োগৰ প্ৰতিশ্ৰুতি দিছে । মাইক্ৰ’ছফ্টৰ অধ্যক্ষ সত্য নাডেলাৰ মতে এই ধনৰাশি এতিয়ালৈকে এছিয়াত কোম্পানীটোৰ সৰ্ববৃহৎ বিনিয়োগ ।

ছচিয়েল মিডিয়াত প্ৰকাশ কৰিলে তথ্য-

মাইক্ৰ’ছফ্টৰ চি ই অ’ সত্য নাডেলাই ছ’চিয়েল মিডিয়া প্লেটফৰ্মত এই কথা ঘোষণা কৰি প্ৰধানমন্ত্ৰী নৰেন্দ্ৰ মোদীক ধন্যবাদ জনায় । তেওঁ লিখিছে, “ধন্যবাদ প্ৰধানমন্ত্ৰী মোদী, ভাৰতৰ এ আইৰ সুযোগৰ বিষয়ে আমাৰ সৈতে কথা পতাৰ বাবে । দেশৰ উচ্চাকাংক্ষাক সমৰ্থন কৰিবলৈ মাইক্ৰ’ছফটে ১৭.৫ বিলিয়ন ডলাৰৰ প্ৰতিশ্ৰুতি দিছে, যিটো এছিয়াত আমাৰ এতিয়ালৈকে সৰ্ববৃহৎ বিনিয়োগ, যিয়ে ভাৰতৰ এ আই-ফাৰ্ষ্ট ভৱিষ্যতৰ বাবে প্ৰয়োজনীয় আন্তঃগাঁথনি আৰু দক্ষতা গঢ়ি তোলাত সহায় কৰিব ।”

এ আই আন্তঃগাঁথনিৰ ওপৰত গুৰুত্ব-

এই বিনিয়োগে মূলতঃ দেশৰ এ আই আৰু ক্লাউড কম্পিউটিঙৰ প্ৰয়োজনীয়তা পূৰণ কৰিবলৈ অত্যাধুনিক ডাটা চেণ্টাৰ আৰু প্ৰযুক্তিৰ আন্তঃগাঁথনি বিকাশৰ ওপৰত গুৰুত্ব আৰোপ কৰিব । ইয়াৰ উপৰিও ভাৰতীয় প্ৰতিভাক এ আই যুগৰ বাবে প্ৰস্তুত কৰাৰ বাবে প্ৰশিক্ষণ আৰু দক্ষতা কাৰ্যসূচীৰ বাবে ধন আগবঢ়াব । মাইক্ৰ’ছফ্টৰ এই উল্লেখযোগ্য বিনিয়োগক বিশ্বৰ এ আই মেপত ভাৰতক প্ৰধান শক্তি হিচাপে প্ৰতিষ্ঠা কৰাৰ দিশত এক বৃহৎ পদক্ষেপ হিচাপে বিবেচিত হৈছে । ইয়াৰ উপৰিও প্ৰধানমন্ত্ৰী মোদীৰ “ডিজিটেল ইণ্ডিয়া” আৰু “আত্মনিৰ্ভৰ ভাৰত”ৰ পদক্ষেপক শক্তিশালী কৰিব ।

লগতে পঢ়ক : এন ডি এ সংসদীয় দলৰ বৈঠকত বংগ নিৰ্বাচনৰ চৰ্চা, সাংসদসকলক প্ৰধানমন্ত্ৰী মোদীয়ে দিলে এই কাম