ব্ৰাজিলিয়াত উপস্থিত হোৱা প্ৰধানমন্ত্ৰী মোদীক শিৱ তাণ্ডৱেৰে আদৰণি

মঙলবাৰে ৰিঅ’ ডি জেনেৰিঅ’ৰ পৰা ব্ৰাজিলৰ ৰাজধানী ব্ৰাজিলিয়াত উপস্থিত হয় প্ৰধানমন্ত্ৰী মোদী । শিৱ তাণ্ডৱ স্তোত্ৰ আৰু ভাৰতীয় শাস্ত্ৰীয় নৃত্যৰে তেওঁক আদৰণি জনোৱা হয় । প্ৰধানমন্ত্ৰী মোদীয়ে ইয়াক “স্মৰণীয় আদৰণি” বুলি অভিহিত কৰি প্ৰৱাসীসকলক তেওঁলোকৰ শিপাৰ সৈতে সংযুক্ত হৈ থকাৰ বাবে প্ৰশংসা কৰে । আজি ব্ৰাজিলৰ ৰাষ্ট্ৰপতি লুলা দা চিলভাৰ সৈতে দ্বিপাক্ষিক আলোচনাত মিলিত হ’ব প্ৰধানমন্ত্ৰী মোদী ।

ব্ৰাজিলিয়াত উপস্থিত হোৱা প্ৰধানমন্ত্ৰী মোদীক বিমানবন্দৰত আদৰণি জনায় ব্ৰাজিলৰ প্ৰতিৰক্ষা মন্ত্ৰীয়ে । প্ৰধানমন্ত্ৰী মোদী হোটেলত উপস্থিত হোৱাৰ লগে লগে ভাৰতীয় সম্প্ৰদায়ে ভাৰত মাতা কি জয় শ্লোগানেৰে তেওঁক আদৰণি জনায় । এই সময়ত প্ৰধানমন্ত্ৰীক আদৰণি জনাই সংগীত আৰু সাংস্কৃতিক অনুষ্ঠানৰো আয়োজন কৰা হয় । প্ৰধানমন্ত্ৰী মোদীৰ সন্মুখত একাংশ বিদেশীয়ে শিৱ তাণ্ডৱ স্তোত্ৰ উপহাৰ দিয়ে । এই শিল্পীসকলক প্ৰশংসা কৰে প্ৰধানমন্ত্ৰী মোদীয়ে । প্ৰধানমন্ত্ৰী মোদীয়ে তেওঁক আদৰিবলৈ অহা শিশুসকলৰ সৈতেও বাৰ্তালাপ কৰে ।

প্ৰধানমন্ত্ৰী মোদীয়ে টুইটাৰত লিখিছে, “কিছু সময়ৰ আগতে ব্ৰাজিলিয়াত উপস্থিত হলো । ভাৰতীয় সম্প্ৰদায়ৰ পৰা স্মৰণীয় আদৰণি, যিয়ে আকৌ এবাৰ দেখুৱাইছে যে আমাৰ প্ৰৱাসীসকল কিমান আৱেগিক আৰু তেওঁলোক নিজৰ শিপাৰ প্ৰতি কিমান আকৃষ্ট ।” তেওঁ কিছু ফটো শ্বেয়াৰ কৰে য’ত উৎসাহী প্ৰবাসী ভাৰতীয়সকলে ত্ৰিৰংগা ধৰি প্ৰধানমন্ত্ৰীক সম্ভাষণ জনোৱা দেখা গৈছে ।

১৭ সংখ্যক ব্ৰিকছ সন্মিলনৰ বাবে ৰিঅ’ ডি জেনেৰিঅ’লৈ ভ্ৰমণ সম্পূৰ্ণ কৰি সোমবাৰে ব্ৰাজিলত উপস্থিত হয় প্ৰধানমন্ত্ৰী মোদী । ২ জুলাইৰ পৰা ১০ জুলাইলৈ ৫খন দেশ ভ্ৰমণত আছে ভাৰতৰ প্ৰধানমন্ত্ৰীগৰাকী । এতিয়ালৈকে তেওঁ ঘানা, ট্ৰিনিদাদ এণ্ড ট’বাগো আৰু আৰ্জেণ্টিনা ভ্ৰমণ কৰিছে । বৰ্তমান তেওঁ ব্ৰাজিল ভ্ৰমণত আছে আৰু ইয়াৰ পৰা নামিবিয়ালৈ যাত্ৰা কৰিব । ৰাজকীয় ভ্ৰমণসূচীৰে ব্ৰাজিলৰ ৰাজধানীত উপস্থিত হোৱা ভাৰতৰ প্ৰধানমন্ত্ৰীগৰাকীক বিমানবন্দৰত আদৰণি জনায় ব্ৰাজিলৰ প্ৰতিৰক্ষা মন্ত্ৰী জোচে মুচিঅ’ মণ্টেইৰ’ ফিলহ’ই ।

লগতে পঢ়ক : ব্ৰিকছৰ নতুন সদস্য হ’ল ইণ্ডোনেছিয়া; বেলাৰুছ, মালয়েছিয়াকে ধৰি দহখন দেশ হ’ল সহযোগী