পৰিৱেশ সংৰক্ষণৰ বাবে কাম কৰি থকা সকলো স্তৰৰ লোককে প্ৰশংসা কৰি প্ৰধানমন্ত্ৰী মোদীয়ে কয়, বিশ্ব পৰিৱেশ দিৱস উপলক্ষে সকলোকে আন্তৰিক শুভেচ্ছা জনাইছোঁ ।

বিশ্ব পৰিৱেশ দিৱস উপলক্ষে দেশবাসীক শুভেচ্ছা জ্ঞাপন কৰাৰ লগতে পৰিৱেশ ৰক্ষা আৰু বহনক্ষম উন্নয়নক অধিক ত্বৰান্বিত কৰাৰ বাবে চৰকাৰৰ সংকল্প পুনৰ দোহাৰিলে প্ৰধানমন্ত্ৰী নৰেন্দ্ৰ মোদীয়ে । শুকুৰবাৰে সামাজিক মাধ্যম এক্সত (X) এটা পোষ্ট শ্বেয়াৰ কৰি প্ৰধানমন্ত্ৰীগৰাকীয়ে বিগত এটা দশকত কেন্দ্ৰীয় চৰকাৰে পৰিস্থিতিতন্ত্ৰৰ পুনৰুদ্ধাৰ আৰু প্ৰাণী সুৰক্ষাৰ বাবে গ্ৰহণ কৰা বিভিন্ন গুৰুত্বপূৰ্ণ প্ৰচেষ্টাসমূহৰ খতিয়ান দাঙি ধৰে ।

পৰিৱেশ সংৰক্ষণৰ বাবে কাম কৰি থকা সকলো স্তৰৰ লোককে প্ৰশংসা কৰি প্ৰধানমন্ত্ৰী মোদীয়ে কয়, “বিশ্ব পৰিৱেশ দিৱস উপলক্ষে সকলোকে আন্তৰিক শুভেচ্ছা জনাইছোঁ । পৰিৱেশ সংৰক্ষণৰ প্ৰতি আগ্ৰহী সকলোকে মই প্ৰশংসা কৰিব বিচাৰিম । আমাৰ পৰিৱেশ ৰক্ষা কৰা আৰু বহনক্ষম উন্নয়নক আগুৱাই নিয়াতো আমাৰ অন্যতম লক্ষ্য । বিগত দশকটোত আমাৰ চৰকাৰে গ্ৰহণ কৰা অলেখ প্ৰচেষ্টাই এই দিশত আমাৰ কাৰ্যসূচীক প্ৰতিফলিত কৰে । ভাৰতৰ কিছুমান প্ৰধান সফলতাৰ ভিতৰত সেউজ আৱৰণ বৃদ্ধি আৰু কেইবাবিধো বন্যপ্ৰাণীৰ জনসংখ্যা বৃদ্ধি পোৱাটো অত্যন্ত সুখবৰ ।”

বন্যপ্ৰাণী সংৰক্ষণ আৰু জৈৱ বৈচিত্ৰ্য-

প্ৰধানমন্ত্ৰীগৰাকীয়ে ভাৰতৰ চহকী জৈৱিক বৈচিত্ৰ্যক লৈ গৌৰৱ প্ৰকাশ কৰে । তেওঁ উল্লেখ কৰে যে চৰকাৰৰ বিশেষ প্ৰজাতি পুনৰুদ্ধাৰ আঁচনিয়ে দেশৰ বন্যপ্ৰাণী আৰু পৰিস্থিতিতন্ত্ৰলৈ ইতিবাচক পৰিৱৰ্তন আনিছে । বিশেষকৈ গ্ৰেট ইণ্ডিয়ান বাষ্টাৰ্ড, স্নো লেপাৰ্ড, শ্লথ বিয়েৰ আৰু চিতাবাঘৰ বাবে চলোৱা সংৰক্ষণ অভিযানে কেনেকৈ এক ধাৰাবাহিক প্ৰতিশ্ৰুতিৰ জৰিয়তে বন্যপ্ৰাণীক সুৰক্ষা দিব পাৰি, তাৰ এক সুন্দৰ নিদৰ্শন দাঙি ধৰিছে ।

ইয়াৰ উপৰি, শেহতীয়াকৈ আৰম্ভ কৰা ‘এক পেড় মা কে নাম’ (Ek Ped Maa Ke Naam) অভিযানৰ সফলতাক প্ৰশংসা কৰি তেওঁ কয় যে এনেধৰণৰ জনমুখী পদক্ষেপে দেশত প্ৰতি বছৰে প্ৰায় ১.১৯ লাখ হেক্টৰ বনভূমি বৃদ্ধিত গুৰুত্বপূৰ্ণ অৱদান আগবঢ়াইছে ।

পৰিৱেশ সুৰক্ষাক গোলকীয় আন্দোলনলৈ ৰূপান্তৰিত কৰিছে মোদীজীয়ে : অমিত শ্বাহ

আনহাতে, কেন্দ্ৰীয় গৃহমন্ত্ৰী অমিত শ্বাহেও বিশ্ব পৰিৱেশ দিৱস উপলক্ষে দেশবাসীক শুভেচ্ছা জ্ঞাপন কৰে । প্ৰধানমন্ত্ৰী নৰেন্দ্ৰ মোদীৰ দূৰদৰ্শী নেতৃত্বৰ প্ৰশংসা কৰি গৃহমন্ত্ৰীগৰাকীয়ে কয় যে বৰ্তমান ভাৰতে সেউজ শক্তি আৰু বহনক্ষম উন্নয়নৰ ক্ষেত্ৰত সমগ্ৰ বিশ্বক পথ দেখুৱাইছে ।

অমিত শ্বাহে কয়, “মোদী জীয়ে পৰিৱেশ সুৰক্ষাক এক গোলকীয় আন্দোলনলৈ ৰূপান্তৰিত কৰিছে । তেওঁৰ নেতৃত্বতে ভাৰতে বিশ্বৰ তৃতীয় বৃহত্তম নবীকৰণযোগ্য শক্তি ক্ষমতা গঢ়ি তুলিছে । ইয়াৰ উপৰি ‘ৰাষ্ট্ৰীয় গ্ৰীণ হাইড্ৰজেন মিছন’ আৰু সৌৰ শক্তিৰ জৰিয়তে দেশৰ লাখ লাখ ঘৰ পোহৰাই তোলা হৈছে । আজি বাৰ্ষিক বনভূমি আৱৰণ বৃদ্ধিৰ ক্ষেত্ৰত সমগ্ৰ বিশ্বৰ ভিতৰতে শীৰ্ষ তিনিখন দেশৰ অন্যতম হিচাপে ভাৰতে গৌৰৱেৰে নেতৃত্ব দিছে ।”

উল্লেখ্য যে, প্ৰতি বছৰে ৫ জুন তাৰিখে বিশ্বজুৰি বিশ্ব পৰিৱেশ দিৱস উদযাপন কৰা হয় । গোলকীয় উষ্ণতা বৃদ্ধি, প্ৰদূষণ, জলবায়ু পৰিৱৰ্তন আৰু জৈৱ বৈচিত্ৰ্য হ্ৰাস পোৱাৰ দৰে জৰুৰী তথা ভয়াৱহ পৰিৱেশগত প্ৰত্যাহ্বানসমূহৰ বিৰুদ্ধে চৰকাৰ, বিভিন্ন সংস্থা আৰু সাধাৰণ জনতাক একগোট হৈ কাম কৰিবলৈ এই দিৱসে উৎসাহিত কৰি আহিছে ।

লগতে পঢ়ক : পুৱাই দেশ কঁপোৱা মৰ্মান্তিক ঘটনা, চিকিৎসালয়ৰ আই চি ইউত বিধ্বংসী অগ্নিকাণ্ড