মহাকাশত প্ৰতিধ্বনিত হ’ব ‘বন্দে মাতৰম’! বিজ্ঞানীসকলক ফোন প্ৰধানমন্ত্ৰী মোদীৰ
মহাকাশৰ ক্ষেত্ৰখনত ভাৰতে আন এক ঐতিহাসিক পদক্ষেপ ল’বলৈ সাজু হৈছে। ভাৰতৰ প্ৰথমটো ব্যক্তিগত কক্ষপথৰ ৰকেট বিক্ৰম-১ৰ সফল উৎক্ষেপণ কৰিছে। যাৰ বাবে প্ৰধানমন্ত্ৰী নৰেন্দ্ৰ মোদীয়ে স্কাইৰুট এৰ’স্পেচ দলটোক অভিনন্দন জনায়।
শনিবাৰে ভাৰতে মহাকাশ খণ্ডত আন এক ঐতিহাসিক সাফল্য অৰ্জন কৰে। দেশৰ প্ৰথমটো ব্যক্তিগত খণ্ডৰ অৰ্বিটেল ৰকেট ‘বিক্ৰম-১’ (Vikram-1) এ সফলতাৰে মহাকাশৰ কক্ষপথত প্ৰৱেশ কৰি এক নতুন ইতিহাস ৰচনা কৰে।এই অভিযানক কেৱল ৰকেট উৎক্ষেপণ হিচাপেই নহয়, ভাৰতৰ দ্ৰুতগতিত বৃদ্ধি পোৱা ব্যক্তিগত মহাকাশ খণ্ডৰ বাবে এক নতুন আৰম্ভণি হিচাপেহে চোৱা হৈছে।
এই সাফল্যৰ পিছতে প্ৰধানমন্ত্ৰী নৰেন্দ্ৰ মোদীয়ে ‘স্কাইৰুট এৰ’স্পেচ’ (Skyroot Aerospace) ৰ সমগ্ৰ দলটোলৈ ফোন কৰি অভিনন্দন জনায় আৰু বিজ্ঞানীসকলক উৎসাহিত কৰে। প্ৰধানমন্ত্ৰী মোদীয়ে কয়, “স্কাইৰুটৰ সমগ্ৰ দলটোলৈ বহুত বহুত অভিনন্দন। আপোনালোকে নিৰ্ধাৰিত সময়তকৈ আগতেই নিজৰ লক্ষ্যত উপনীত হ’ব পাৰিব।”
মিছনৰ সফলতাৰ ঠিক পিছতেই স্কাইৰুটৰ প্ৰতিষ্ঠাপকসকলে প্ৰধানমন্ত্ৰীৰ সৈতে বাৰ্তালাপ কৰে, য’ত তেওঁলোকে এই সাফল্যক ভাৰতৰ ব্যক্তিগত মহাকাশ খণ্ডৰ বাবে এক ডাঙৰ পদক্ষেপ বুলি অভিহিত কৰে।
‘মিছন আগমন’ (Mission Aagman) নামেৰে উৎক্ষেপণ কৰা বিক্ৰম-১ ৰকেটে ইয়াৰ চাৰিওটা পৰ্যায়ৰ প্ৰদৰ্শন সফলতাৰে সম্পূৰ্ণ কৰে আৰু প্ৰায় ৪৫০ কিলোমিটাৰ উচ্চতাৰ নিম্ন পৃথিৱী কক্ষপথত নিজৰ পেলোডসমূহ সফলতাৰে স্থাপন কৰে। এইটো ভাৰতৰ প্ৰথমটো ব্যক্তিগতভাৱে বিকশিত কৰা অৰ্বিটেল-ক্লাছ ৰকেট, যিয়ে প্ৰথমটো প্ৰয়াসতে উৎক্ষেপণৰ পৰা আদি কৰি উপগ্ৰহ স্থাপনলৈকে সকলো পৰ্যায় সফলতাৰে সম্পূৰ্ণ কৰিবলৈ সক্ষম হৈছে।
এই মিছনৰ সৈতে আন এক বিশেষ মুহূৰ্তও জড়িত হৈ পৰিল। প্ৰধানমন্ত্ৰী নৰেন্দ্ৰ মোদীৰ হস্তাক্ষৰযুক্ত ‘বন্দে মাতৰম’ মন্ত্ৰও এই মিছনৰ জৰিয়তে মহাকাশৰ কক্ষপথত উপনীত হয়। ইয়াক ভাৰতৰ বৈজ্ঞানিক সাফল্য আৰু ৰাষ্ট্ৰীয় গৌৰৱৰ প্ৰতীক হিচাপে গণ্য কৰা হৈছে।
লগতে পঢ়ক: গগণ ফালি মহাকাশত বিক্ৰম-১; 3D-প্ৰিণ্টেড ইঞ্জিনৰ শক্তিৰে স্কাইৰুটৰ ইতিহাস