বাল্য বিবাহৰ বিৰুদ্ধে ৰাজ্যত পুনৰ আৰম্ভ অভিযান । শনিবাৰৰ নিশাৰ পৰা আৰম্ভ তৃতীয় হৈছে পৰ্যায়ৰ অভিযান । চৰ-চাপৰিৰ পৰা গাঁৱে-ভূঞে, চহৰে-নগৰে সকলোতে চলিছে অভিযান । অভিযানত এই পৰ্যন্ত গ্ৰেপ্তাৰ হৈছে ৪১৬জন অবৈধ স্বামী । এই সন্দৰ্ভত ৰাজ্যত ৰুজু হৈছে সৰ্বমুঠ ৩৩৫টা গোচৰ । ধৃত আটাইকে আজি পৃথকে পৃথকে হাজিৰ কৰোৱা হ’ব আদালতত । ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মাই সামাজিক মাধ্যমত দিলে এই বিশেষ তথ্য ।

ইয়াৰ মাজতে ধুবুৰীতো নিশা উজাগৰে থাকি আৰক্ষীয়ে মাৰাথন অভিযান চলালে বাল্য বিবাহৰ বিৰুদ্ধে । এই অভিযানত অবৈধ স্বামী আৰু বাল্য বিবাহৰ লগত জড়িত কেইবাজনো লোকক গ্ৰেপ্তাৰ কৰিছে আৰক্ষীয়ে । নিশাৰ ভাগত ধুবুৰীৰ বিভিন্ন প্ৰান্তৰ পৰা গ্ৰেপ্তাৰ কৰা হয় এইসকল অভিযপক্তক । গোলকগঞ্জত ১০, গৌৰীপুৰত ১৪, বিলাসীপাৰাত ২৩,আগমনিত ৪জনক গ্ৰেপ্তাৰ ।

গোৱালপাৰা আৰু শ্ৰীভূমিতো আৰক্ষীৰ জালত পৰিছে অবৈধ স্বামী । গোৱালপাৰাত আৰক্ষীৰ জালত পৰিছে ২০জন অবৈধ স্বামী । আনহাতে শ্ৰীভূমি জিলাতো নিশা গ্ৰেপ্তাৰ ২২জন অবৈধ স্বামী । এই পৰ্যন্ত শ্ৰী ভূমি জিলাত বাল্য বিবাহৰ বিৰুদ্ধে ৰুজু হৈছে ১৯টা গোচৰ । ইফালে বৰপেটা ৰোডত গ্ৰেপ্তাৰ ১২জন, ধুবুৰীত গ্ৰেপ্তাৰ ১৭জন, নগৰবেৰাত ৬ জন, ছাগলীয়াত বৰ্তমানলৈ আৰক্ষীৰ জালত পৰিছে ৬ জন ।

উল্লেখ্য যে, মুখ্যমন্ত্ৰী হিমন্ত বিশ্ব শৰ্মাই দায়িত্বভাৰ গ্ৰহণ কৰাৰ পিছতেই ৰাজ্যত দুবাৰকৈ চলিছিল বাল্য বিবাহ বিৰোধী অভিযান । এই দুয়োা অভিযানতে অবৈধ স্বামীসহ আৰক্ষীৰ জালত পৰিছিল বাল্য বিবাহৰ সৈতে জৰিত সহস্ৰাধিক লোক । ইয়াৰ পিছতেই এতিয়া ৰাজ্যত আৰক্ষীয়ে আৰম্ভ কৰিছে বাল্য বিবাহ বিৰোধী তৃতীয় পৰ্যায়ৰ অভিযান । এই অভিযানত অবৈধ স্বামীৰ পৰা শাহু-শহুৰ, অভিভাৱক, কাজী-পুৰোহিতলৈকে সাৰি নাযাব কোনো লোক । এই অভিযানৰ পৰা নিস্তাৰ নাপাব নাবালিকাৰ বিবাহ সম্পন্ন কৰা সকল ।