দেওবাৰে নামৰূপত উপস্থিত হৈ কংগ্ৰেছ দলক তীব্ৰ সমালোচনা কৰে প্ৰধানমন্ত্ৰী মোদীয়ে । তেওঁ কংগ্ৰেছে অসমত বাংলাদেশী অনুপ্ৰৱেশকাৰীক সংস্থাপন দিয়াৰ অভিযোগ উত্থাপন কৰে ।

অসম ভ্ৰমণৰ দ্বিতীয় দিনা প্ৰধানমন্ত্ৰী নৰেন্দ্ৰ মোদীয়ে দেওবাৰে অসমৰ বাবে এক বৃহৎ উন্নয়নমূলক প্ৰকল্পৰ কথা ঘোষণা কৰে । তেওঁ ডিব্ৰুগড় জিলাৰ নামৰূপত ১০,৬০১ কোটি টকা ব্যয় সাপেক্ষে নিৰ্মাণ হ’বলগা সাৰ উদ্যোগৰ আধাৰশিলা স্থাপন কৰে । এই উদ্যোগটোৰ বছৰি প্ৰায় ১২ লাখ মেট্ৰিক টন সাৰ উৎপাদনৰ ক্ষমতা থাকিব ।

এই প্ৰকল্পৰ ভূমি পূজন তথা আধাৰশিলা স্থাপনৰ পিছতেই এক বৃহৎ জনসভাত ভাষণ প্ৰদান কৰে প্ৰধানমন্ত্ৰীগৰাকীয়ে । ভাষণত প্ৰধানমন্ত্ৰী মোদীয়ে কয়, “আজি অসম তথা সমগ্ৰ উত্তৰ-পূৰ্বাঞ্চলৰ বাবে এক ঐতিহাসিক দিন । নামৰূপ আৰু ডিব্ৰুগড়ে যিটো প্ৰকল্পৰ বাবে অপেক্ষা কৰি আছিল সেয়া আজি সাকাৰ হৈ উঠিছে ।” অঞ্চলটোত ঔদ্যোগিক প্ৰগতিৰ এক নতুন অধ্যায় আৰম্ভ হৈছে বুলি উল্লেখ কৰে প্ৰধানমন্ত্ৰীগৰাকীয়ে । প্ৰধানমন্ত্ৰী মোদীয়ে কয় যে আজি অসমে উন্নয়নৰ এক নতুন গতি লাভ কৰিছে আৰু এয়া মাত্ৰ আৰম্ভণিহে ।

অবৈধ অনুপ্ৰৱেশকাৰীক সংস্থাপন কৰিলে কংগ্ৰেছে- প্ৰধানমন্ত্ৰী

প্ৰধানমন্ত্ৰী মোদীয়ে কয় যে কংগ্ৰেছে অবৈধ অনুপ্ৰৱেশকাৰীক সংস্থাপন কৰিছিল আৰু তেওঁলোকক সুৰক্ষা প্ৰদান কৰি আছে । সেইবাবেই কংগ্ৰেছ দলে ভোটাৰ তালিকা শুদ্ধিকৰণৰ বিৰোধিতা কৰিছে । মই আপোনালোকক নিশ্চয়তা দিছো যে বিজেপিয়ে নিজৰ পৰিচয় আৰু সন্মান ৰক্ষাৰ বাবে অসমৰ সৈতে থিয় দিব । আমি অসমক এই কংগ্ৰেছৰ তুষ্টিকৰণ আৰু ভোট বেংকৰ ৰাজনীতিৰ বিষৰ পৰা ৰক্ষা কৰিব লাগিব ।

তেওঁ কয় যে কংগ্ৰেছ দলে এতিয়াও ৰাষ্ট্ৰ বিৰোধী চিন্তাধাৰাৰ প্ৰচাৰ চলাই আছে । বাংলাদেশী অনুপ্ৰৱেশকাৰীক অসমৰ বনাঞ্চল আৰু মাটিত সংস্থাপন কৰিব বিচাৰে কংগ্ৰেছে । তেওঁলোকে কেৱল নিজৰ ভোট বেংক শক্তিশালী কৰিব বিচাৰে, তেওঁলোকে আপোনালোকৰ কথা চিন্তা নকৰে । আপোনালোকৰৰ পৰিচয়ৰ লগত কংগ্ৰেছ দলৰ কোনো সম্পৰ্ক নাই ।

কৃষকৰ বিষয় লৈ কংগ্ৰেছক আক্ৰমণ-

প্ৰধানমন্ত্ৰী মোদীয়ে তেওঁৰ ভাষণত কংগ্ৰেছ দলক তীব্ৰ আক্ৰমণ চলায় । তেওঁ উল্লেখ কৰে যে কংগ্ৰেছৰ নীতিয়ে দশক দশক ধৰি কৃষকৰ দুৰ্দশা আৰু শোচনীয় কৰি তুলিছিল, আনহাতে তেওঁৰ চৰকাৰে তেওঁলোকক সবলীকৰণৰ বাবে অক্লান্তভাৱে কাম কৰি আহিছে । প্ৰধানমন্ত্ৰীগৰাকীয়ে উল্লেখ কৰে যে সাৰ কাৰখানাৰ দৰে প্ৰকল্পই কৃষকসকলক সুলভ মূল্যৰ সাৰ প্ৰদান কৰাই নহয়, অঞ্চলটোৰ কৰ্মসংস্থাপন আৰু উদ্যোগিক বিকাশৰ ক্ষেত্ৰতো উত্থান ঘটাব । কংগ্ৰেছৰ শাসনকালত কেৱল অসমতে নহয়, সমগ্ৰ দেশতে বহু ইউৰিয়া কাৰখানা বন্ধ হৈ আছিল । ইয়াৰ ফলত কৃষকসকলে সাৰ বিচাৰি দীঘলীয়া শাৰী পাতি থিয় হ’বলগীয়া হৈছিল আৰু পৰিস্থিতি নিয়ন্ত্ৰণৰ বাবে প্ৰায়ে আৰক্ষী নিয়োগ কৰা হৈছিল । প্ৰধানমন্ত্ৰী মোদীয়ে উল্লেখ কৰে যে সেই সময়ছোৱাত কৃষকসকলে ইমান কষ্টৰ সন্মুখীন হৈছিল যে কিছুমান ক্ষেত্ৰত লাঠিচাৰ্জৰো সন্মুখীন হৈছিল । কংগ্ৰেছ চৰকাৰে কৃষকৰ প্ৰয়োজনীয়তাক আওকাণ কৰা বুলি অভিযোগ উত্থাপন কৰে প্ৰধানমন্ত্ৰী মোদীয়ে ।

প্ৰধানমন্ত্ৰীয়ে কয় যে তেওঁৰ ডাবল ইঞ্জিন চৰকাৰে কংগ্ৰেছৰ দিনত উদ্ভৱ হোৱা এই সমস্যাসমূহ সমাধানৰ বাবে আন্তৰিকতাৰে কাম কৰি আছে । যোৱা ১১ বছৰত বহু কাম হৈছে যদিও বহু কাম বাকী আছে । প্ৰধানমন্ত্ৰী মোদীয়ে লগতে কয় যে কংগ্ৰেছৰ দিনত সাৰ কাৰখানা বন্ধ হৈ থকাৰ সময়তে তেওঁৰ চৰকাৰে দেশৰ বিভিন্ন প্ৰান্তত নতুন সাৰ উদ্যোগ স্থাপন কৰিছে, যাতে কৃষকসকলে সময়মতে সাৰ লাভ কৰিব পাৰে আৰু পুনৰ এনে সমস্যাৰ সন্মুখীন হ’ব নালাগে ।

“কৃষকৰ সৈতে থিয় দিছে বিজেপি চৰকাৰ”

প্ৰধানমন্ত্ৰী মোদীয়ে উল্লেখ কৰে যে আজি বিজেপি চৰকাৰে বীজৰ পৰা বজাৰলৈকে কৃষকৰ সৈতে থিয় দিছে । খেতিৰ কামৰ বাবে ধন পোনপটীয়াকৈ তেওঁলোকৰ একাউণ্টলৈ ট্ৰেন্সফাৰ কৰা হৈছে, যাৰ ফলত কৃষকসকলে ঋণৰ বাবে হাবাথুৰি খাব নালাগে । এতিয়ালৈকে প্ৰায় ৪ লাখ কোটি টকা প্ৰধানমন্ত্ৰী কিষাণ সন্মান নিধিৰ অধীনত কৃষকৰ একাউণ্টলৈ ট্ৰেন্সফাৰ কৰা হৈছে । এইবাৰ কৃষকসকলক সহায়ৰ বাবে ৩৫,০০০ কোটি টকাৰ দুখন নতুন আঁচনি আৰম্ভ কৰা হৈছে : পি এম ধান্য ধন কৃষি যোজনা আৰু পালছেছ আত্মনিৰ্ভৰশীল অভিযান । ইয়াৰ ফলত কৃষি বৃদ্ধি পাব । তেওঁ আৰু কয়, “আমাৰ ‘সবকা সাথ, সবকা বিকাশ’ৰ দৃষ্টিভংগীয়ে দেশৰ দৰিদ্ৰ লোকৰ জীৱনলৈ গভীৰ পৰিৱৰ্তন আনিছে । যোৱা ১১ বছৰত আমাৰ প্ৰচেষ্টাই ২৫ কোটি লোকক দৰিদ্ৰতাৰ পৰা উলিয়াই আনিছে । দেশত এক নতুন মধ্যবিত্ত শ্ৰেণীৰ উত্থান ঘটিছে ।”

উন্নয়নৰ নতুন যুগত প্ৰৱেশ কৰিছে অসম- প্ৰধানমন্ত্ৰী মোদী

প্ৰধানমন্ত্ৰীয়ে সমগ্ৰ দেশৰ কৃষকসকলক এই আধুনিক সাৰ উদ্যোগৰ বাবে অভিনন্দন জ্ঞাপন কৰে । তেওঁ কয় যে বিজেপিৰ ডাবল ইঞ্জিন চৰকাৰৰ অধীনত উদ্যোগ আৰু সংযোগ হাতে হাতে আগবাঢ়িছে, অসমৰ সপোনক ডেউকা দি যুৱক-যুৱতীসকলৰ মাজত নতুন সুযোগৰ আশা জগাই তুলিছে । প্ৰধানমন্ত্ৰী মোদীয়ে কয় যে উন্নত ভাৰত গঢ়ি তোলাত কৃষকৰ ভূমিকা অতি গুৰুত্বপূৰ্ণ । এই দৃষ্টিভংগীৰে চৰকাৰে কৃষকৰ স্বাৰ্থক অগ্ৰাধিকাৰ দিয়াৰ বাবে অহৰহ কাম কৰি আছে । তেওঁ কয় যে প্ৰায় ১১ হাজাৰ কোটি টকা ব্যয়ৰে নিৰ্মিত এই উদ্যোগটোৱে বছৰি ১২ লাখ মেট্ৰিক টন সাৰ উৎপাদন কৰিব । প্ৰধানমন্ত্ৰীয়ে উল্লেখ কৰে যে এই উদ্যোগটো মুকলি হ’লে সাৰ যোগানত সুবিধা হ’ব আৰু লজিষ্টিক ব্যয় যথেষ্ট হ্ৰাস পাব, যাৰ ফলত কৃষকসকল প্ৰত্যক্ষভাৱে উপকৃত হ’ব ।

লগতে পঢ়ক : ‘কংগ্ৰেছে কৰা ভূলৰ আমি শুধৰণি কৰি আছো’; কংগ্ৰেছক ক্ষুৰধাৰ সমালোচনা প্ৰধানমন্ত্ৰী মোদীৰ