ইউৰোপীয় দেশসমূহৰ সৈতে সম্পৰ্ক অধিক গভীৰ আৰু অংশীদাৰিত্ব শক্তিশালী কৰাৰ লক্ষ্যৰে শনিবাৰে প্ৰধানমন্ত্ৰী নৰেন্দ্ৰ মোদীয়ে ফ্ৰান্স আৰু শ্লোভাকিয়া ৰাজ্যিক ভ্ৰমণৰ বাবে ৰাওনা হয়।

শনিবাৰে প্ৰধানমন্ত্ৰী নৰেন্দ্ৰ মোদীয়ে ফ্ৰান্স আৰু শ্লোভাকিয়া ভ্ৰমণৰ বাবে যাত্ৰা কৰিছে। ইউৰোপীয় দেশসমূহৰ সৈতে সম্পৰ্ক অধিক গভীৰ কৰা আৰু অংশীদাৰিত্ব শক্তিশালী কৰাৰ উদ্দেশ্যে ফ্ৰান্সলৈ তেওঁৰ চৰকাৰী ভ্ৰমণ আৰু শ্ল’ভাকিয়ালৈ ৰাষ্ট্ৰীয় ভ্ৰমণৰ বাবে যাত্ৰা কৰিছে। নিজৰ যাত্ৰাৰ বিবৃতিত তেওঁ উল্লেখ কৰে যে ভাৰতৰ কৌশলগত দৃষ্টিভংগীত ফ্ৰান্সে এক বিশেষ স্থান অধিকাৰ কৰি আহিছে।

প্ৰধানমন্ত্ৰী গৰাকীয়ে কয় যে, “এই বছৰৰ আৰম্ভণিতে ৰাষ্ট্ৰপতি মেক্ৰনে ভাৰত ভ্ৰমণ কৰিছিল আৰু আমি আমাৰ সম্পৰ্কক এক ‘বিশেষ গোলকীয় কৌশলগত অংশীদাৰিত্ব’লৈ উন্নীত কৰিছিলোঁ। যেতিয়া মই নিচ (Nice) চহৰত ৰাষ্ট্ৰপতি মেক্ৰনক লগ পাম, আমি ফেব্ৰুৱাৰী মাহৰ পৰা হ’ব লগীয়া প্ৰগতিৰ পৰ্যালোচনা কৰিম আৰু আমাৰ সহযোগিতাৰ পৰৱৰ্তী পদক্ষেপসমূহ নিৰ্ধাৰণ কৰিম। মই পাৰস্পৰিক স্বাৰ্থজড়িত গুৰুত্বপূৰ্ণ গোলকীয় বিষয়সমূহৰ ওপৰত আমাৰ আলোচনাৰ বাবেও আগ্ৰহেৰে বাট চাইছোঁ,”।

প্ৰধানমন্ত্ৰী মোদীয়ে লগতে কয় যে ১৪ জুন ২০২৬ ত তেওঁ ৰাষ্ট্ৰপতি মেক্ৰনৰ সৈতে নিচ চহৰত ‘ভাৰত ইনোভেটেটছ্’ উদ্বোধন কৰিব। ভাৰত-ফ্ৰান্স উদ্ভাৱন বৰ্ষৰ পটভূমিত অনুষ্ঠিত হ’বলগীয়া এই ঐতিহাসিক অনুষ্ঠানে ভাৰতৰ আটাইতকৈ প্ৰতিশ্ৰুতিপূৰ্ণ ষ্টাৰ্ট-আপসমূহক গোলকীয় বিনিয়োগৰ সৈতে সংযোগ কৰিব আৰু ভাৰতৰ উচ্চ শিক্ষা ব্যৱস্থাৰ পৰা আত্মপ্ৰকাশ কৰা উদ্ভাৱনসমূহৰ বাবে এক ডাঙৰ ত্বৰক হিচাপে কাম কৰিব।

নিচ চহৰৰ পৰা তেওঁ ১৪-১৫ জুন ২০২৬ লৈ এক ৰাষ্ট্ৰীয় ভ্ৰমণৰ বাবে শ্ল’ভাকিয়া প্ৰজাতন্ত্ৰলৈ ৰাওনা হ’ব। ১৯৯৩ চনত শ্ল’ভাকিয়াই স্বাধীনতা লাভ কৰাৰ পিছত কোনো এগৰাকী ভাৰতীয় প্ৰধানমন্ত্ৰীৰ এয়া প্ৰথমটো ভ্ৰমণ।

প্ৰধানমন্ত্ৰী মোদীয়ে কয় “এই ঐতিহাসিক ভ্ৰমণে আমাৰ দ্বিপাক্ষিক সম্পৰ্কৰ শক্তিশালী গতিশীলতাক অধিক মজবুত কৰিব। মই ব্ৰাটিচলাভাত ৰাষ্ট্ৰপতি পেলেগ্ৰিনি আৰু প্ৰধানমন্ত্ৰী ফিচোৰ সৈতে বৈঠকত মিলিত হ’বলৈ আগ্ৰহী। ইয়াৰ উপৰিও মই শ্ল’ভাকিয়াৰ ব্যৱসায়িক নেতাসকলৰ সৈতেও বাৰ্তালাপ কৰাৰ সুযোগ পাম। ভাৰত-ইউৰোপীয় ইউনিয়ন মুক্ত বাণিজ্য চুক্তিৰ গতিশীলতাক ভিত্তি কৰি এই ভ্ৰমণে ইউৰোপীয় ইউনিয়নৰ সৈতে আমাৰ কৌশলগত অংশীদাৰিত্বক অধিক সজীৱ কৰি তুলিব, যাৰ ভিতৰত শ্ল’ভাকিয়া এক গুৰুত্বপূৰ্ণ আৰু মূল্যবান সদস্য,” ।

“শ্ল’ভাকিয়াৰ পৰা মই এভিয়ানলৈ যাত্ৰা কৰিম, য’ত মই ১৬ আৰু ১৭ জুন ২০২৬ ত অনুষ্ঠিত হ’বলগীয়া জি-৭ (G7) সন্মিলনত অংশগ্ৰহণ কৰিম। জি-৭ ত ভাৰতৰ উপস্থিতিয়ে আমাৰ অংশীদাৰসকলে আমাৰ ওপৰত ৰখা বিশ্বাস আৰু আমাৰ ক্ৰমবৰ্ধমান গোলকীয় মৰ্যাদাক প্ৰতিফলিত কৰে। ভাৰতক একেৰাহে অষ্টমবাৰৰ বাবে জি-৭ সন্মিলনলৈ আমন্ত্ৰণ জনোৱা হৈছে। জি-৭ ত ভাৰতে কেৱল নিজৰ বাবেই কথা নকয়, বৰঞ্চ ই গ্ল’বেল চাউথৰ (Global South – বিশ্বৰ উন্নয়নশীল দেশসমূহ) প্ৰত্যাশাবোৰকো কণ্ঠ প্ৰদান কৰিব বুলিও প্ৰধানমন্ত্ৰী গৰাকীয়ে উল্লেখ কৰে।

প্ৰধানমন্ত্ৰী মোদীয়ে উল্লেখ কৰে যে তেওঁ ১৮ জুন ২০২৬ ত পেৰিছত ফ্ৰান্স ভ্ৰমণৰ সামৰণি মাৰিব, য’ত তেওঁ ৰাষ্ট্ৰপতি মেক্ৰনৰ সৈতে ‘ভিভাটেনেক ২০২৬’ (VivaTech 2026) ত অংশগ্ৰহণ কৰিব। ভিভাটেনেক হৈছে প্ৰযুক্তি আৰু উদ্ভাৱনৰ ক্ষেত্ৰত ইউৰোপৰ আটাইতকৈ আগশাৰীৰ সমাৱেশ, আৰু এই সংস্কৰণত ভাৰতৰ আটাইতকৈ ডাঙৰ ৰাষ্ট্ৰীয় পেভিলিয়ন থাকিব, যিটো ভাৰতীয় আৰু ইউৰোপীয় উদ্ভাৱন ব্যৱস্থাৰ মাজত থকা অংশীদাৰিত্বৰ বিশাল সম্ভাৱনাৰ এক উপযুক্ত প্ৰতীক।

প্ৰধানমন্ত্ৰী মোদীয়ে কয় “মই নিশ্চিত যে ফ্ৰান্স আৰু শ্ল’ভাকিয়া ভ্ৰমণে ইউৰোপ আৰু জি-৭ ৰ সৈতে ভাৰতৰ গভীৰ সম্পৰ্কক অধিক শক্তিশালী কৰিব, আৰু সমগ্ৰ মহাদেশখন তথা তাৰ বাহিৰেও আমাৰ অংশীদাৰিত্বৰ পৰিসৰ সম্প্ৰসাৰিত কৰাৰ ক্ষেত্ৰত আমাৰ অটল প্ৰতিশ্ৰুতিক প্ৰদৰ্শন কৰিব।”

লগতে পঢ়ক: পুৱাই অভিষেক বেনাৰ্জীৰ ঘৰত কলকাতা আৰক্ষীৰ দল; মমতা বেনাৰ্জীও উপস্থিত