২০২৫ বৰ্ষটো অতি বিশেষ হ’ব কাৰণ এই বছৰত মহা কুম্ভ অনুষ্ঠিত হ’ব। মহা কুম্ভ প্ৰতি ১২ বছৰৰ মূৰে মূৰে হে অনুষ্ঠিত কৰা হয়।সেয়েহে ইয়াৰ গুৰুত্ব বহুগুণে বেছি।

প্ৰয়াগৰাজৰ মহাকুম্ভৰ সময়ত, মানুহে কল্পবাস গ্ৰহণ কৰে, গংগাত গা ধোৱে আৰু জপ কৰে। বিশ্বাস কৰা হয় যে মহাকুম্ভৰ সময়ত গংগাত স্নান কৰিলে এজন ব্যক্তিৰ জন্ম-জন্মান্তৰৰ পাপবোৰ নোহোৱা হয় আৰু আগন্তুক জীৱন সুখী হয়। মহাকুম্ভৰ ইতিহাস কি, নতুন বছৰত কেতিয়া আৰম্ভ হ’ব, জানো আহক।

কুম্ভ মেলা ১৩ জানুৱাৰী, ২০২৫ তাৰিখে আৰম্ভ হ’ব, আৰু মহাশিৱৰাত্ৰিৰ সৈতে মিলি ২৬ ফেব্ৰুৱাৰী, ২০২৫ তাৰিখে সমাপ্ত হ’ব।

মহাকুম্ভ আয়োজন কৰাটো এক প্ৰাচীন পৰম্পৰা, যি বৈদিক সময়ৰ পৰা চলি আহিছে। ইয়াৰ আঁৰৰ মুখ্য উদ্দেশ্য হৈছে পবিত্ৰ নদীত গা ধোৱা, যি বিশ্বাস অনুসৰি মানুহৰ পাপ ধ্বংস কৰে আৰু মোক্ষ প্ৰাপ্ত কৰাত সহায় কৰে।

যেতিয়া দুৰ্বাসা ঋষিৰ অভিশাপৰ বাবে দেৱতাসকল শক্তিহীন হৈ পৰিছিল আৰু ৰাক্ষস ৰজা বলিৰ তিনিখন পৃথিৱীত ৰাজত্ব আছিল, তেতিয়া দেৱতাসকলে ভগৱান বিষ্ণুৰ ওচৰলৈ গৈ প্ৰাৰ্থনা কৰিছিল আৰু তেওঁলোকৰ দুৰ্যোগৰ বৰ্ণনা কৰিছিল।

কুম্ভ মেলাৰ আৰম্ভণিৰ কাহিনীটো পৌৰাণিক কাহিনীত সাগৰ মন্থনৰ কথাৰ সৈতে সম্পৰ্কিত। ভগৱান বিষ্ণুৱে দেৱতাসকলক সাগৰ মন্থন কৰিবলৈ কৈছিল।

জনশ্ৰুতি অনুসৰি, যেতিয়া দেৱতা আৰু অসুৰসকলে অমৃত পাবলৈ সাগৰমন্থন কৰিছিল, সেই মন্থনৰ পৰা অমৃতৰ ঘট (ভাণ্ডাৰ) ওলাই আহিছিল।

কুম্ভৰ অৰ্থও ভাণ্ডাৰ। অমৃত পাবলৈ দেৱতা আৰু অসুৰসকলৰ মাজত যুদ্ধ আৰম্ভ হয়, যাৰ বাবে ভগৱান বিষ্ণুৱে তেওঁৰ বাহন গৰুড়ক অমৃতৰ ভাণ্ডাৰ সুৰক্ষিত কৰাৰ দায়িত্ব অৰ্পণ কৰে।

যেতিয়া গৰুড়ে অমৃত লৈ উৰি আছিল, চাৰিটা ঠাইত কেইটোপালমান অমৃত পৰিছিল। সেই চাৰি স্থান হৈছে প্ৰয়াগৰাজ, হৰিদ্বাৰ, উজ্জয়িনী আৰু নাছিক।

তেতিয়াৰ পৰা, কুম্ভ মেলা প্ৰতি ১২ বছৰৰ মুৰে মুৰে এই স্থানবোৰত অনুষ্ঠিত হয়। এই সময়ছোৱাত, মানুহে গঙ্গাৰ ওপৰত বিশ্বাস ৰাখি তেওঁলোকৰ পাপৰ প্ৰায়শ্চিত্ত কৰে।

এইটো বিশ্বাস কৰা হয় যে দেৱতা আৰু অসুৰসকলৰ মাজত ১২ দিনীয়া যুদ্ধ হৈছিল, যাক মানৱ বৰ্ষত ১২ বছৰৰ সমান বুলি গণ্য কৰা হয়। সেয়েহে, কুম্ভ প্ৰতি ১২ বছৰত অন্তত অনুষ্ঠিত হয়।