শিল্পী জুবিন গাৰ্গৰ প্ৰতি শ্ৰদ্ধাঞ্জলি জনাই ২০২৬ বৰ্ষৰ আগন্তুক ৰঙালী বিহু উদযাপনৰ সকলো সংগীত অনুষ্ঠান বাতিল কৰা হৈছে বুলি ঘোষণা

অসমীয়াৰ হিয়াৰ আমঠু শিল্পী জুবিন গাৰ্গৰ প্ৰতি শ্ৰদ্ধাঞ্জলি জনাই চেপন কেন্দ্ৰীয় ৰঙালী বিহু সন্মিলনে গ্ৰহণ কৰিছে বিশেষ পদক্ষেপ । চেপন কেন্দ্ৰীয় ৰঙালী বিহু সমিতিয়ে ঘোষণা কৰিছে যে শিল্পী জুবিন গাৰ্গৰ প্ৰতি শ্ৰদ্ধাঞ্জলি জনাই ২০২৬ বৰ্ষৰ আগন্তুক ৰঙালী বিহু উদযাপনৰ সকলো সংগীত অনুষ্ঠান বাতিল কৰা হ’ব ।

এক আনুষ্ঠানিক বিবৃতিত বিহু সমিতিয়ে অসমীয়া সংগীত আৰু সংস্কৃতিলৈ গাৰ্গৰ অপৰিসীম অৱদানৰ প্ৰতি শ্ৰদ্ধা নিবেদন কৰি তেওঁক এগৰাকী সাংস্কৃতিক আইকন হিচাপে অভিহিত কৰে, যাৰ উত্তৰাধিকাৰে প্ৰজন্মৰ পিছত প্ৰজন্মক অনুপ্ৰাণিত কৰি যাব । সমিতিয়ে কয় যে এইবাৰৰ উদযাপন কেৱল এক সন্মান প্ৰদৰ্শক প্ৰতীকী পতাকা উত্তোলন কাৰ্যসূচীত সীমিত থাকিব ।

চেপন কেন্দ্ৰীয় ৰঙালী বিহু সন্মিলনৰ এই সিদ্ধান্তই ছচিয়েল মিডিয়াত ব্যাপক সমৰ্থন লাভ কৰিছে আৰু বহু লোকে অসমৰ অন্যান্য বিহু সমিতিসমূহকো প্ৰয়াত শিল্পীগৰাকীৰ সন্মানাৰ্থে অনুৰূপ পদক্ষেপ ল’বলৈ আহ্বান জনাইছে ।

লগতে পঢ়ক : কৰ্মক্ষেত্ৰত হোৱা নিৰ্যাতন ৰোধ কৰিবলৈ ৰাজ্য চৰকাৰৰ সকলো বিভাগতে উপলব্ধ হ’ব ‘SHe-Box’