লিয়নেল মেছিৰ অভিলেখ ভংগকাৰী ২০ সংখ্যক বিশ্বকাপ গ’ল আৰু অতিৰিক্ত সময়ত নিৰ্ণায়ক ষ্ট্ৰাইকৰ দ্বাৰা চালিত আৰ্জেণ্টিনাই ফিফা বিশ্বকাপত কেপ ভাৰ্ডেক ৩-২ গ’লত পৰাস্ত কৰি ফিফা বিশ্বকাপৰ ১৬ ৰাউণ্ডত স্থান নিশ্চিত কৰে।

ফিফা বিশ্বকাপত ডিফেণ্ডিং চেম্পিয়ন আৰ্জেণ্টিনাই এক ৰোমাঞ্চকৰ মেচত কেপ ভাৰ্ডেক ৩-২ গ’লত পৰাস্ত কৰি ৰাউণ্ড অব-১৬ত প্ৰৱেশ কৰিছে। শনিবাৰে মিয়ামি গাৰ্ডেনচত অনুষ্ঠিত এই খেলখনত প্ৰথমবাৰৰ বাবে বিশ্বকাপ খেলা কেপ ভাৰ্ডে শেষ মুহূৰ্তলৈকে আৰ্জেণ্টিনাক তীব্ৰ প্ৰত্যাহ্বান জনায়, কিন্তু অতিৰিক্ত সময়ৰ ১১১ নম্বৰ মিনিটত হোৱা এটা ‘অ’ন গ’লে’ মেচখনৰ ভাগ্য নিৰ্ধাৰণ কৰে।

আৰ্জেণ্টিনাৰ জয়ৰ নিৰ্ণায়ক গ’লটো কেপ ভাৰ্ডেৰ ডিফেণ্ডাৰ ডিনি বৰ্জেছে নিজৰ গ’ল হিচাপে ৰেকৰ্ড কৰে। ক্ৰীষ্টিয়ান ৰোমেৰোৰ হেডাৰটো ৰোধ কৰাৰ প্ৰয়াসত বলটো বর্জেছৰ পৰা আঁতৰি গৈ গ’লপোষ্টত সোমাই পৰে আৰু আৰ্জেণ্টিনাই ৩-২ ব্যৱধানত অগ্ৰগতি লাভ কৰে, যিটো খেলৰ শেষলৈকে অক্ষুণ্ণ থাকে।

ইয়াৰ পূৰ্বে অধিনায়ক লিয়োনেল মেছীয়ে ২৯ নম্বৰ মিনিটত এটা সুন্দৰ গ’ল দি আৰ্জেণ্টিনাক ১-০ ব্যৱধানত আগুৱাই লৈ গৈছিল। আনহাতে, লিসান্দ্ৰো মাৰ্টিনেজে অতিৰিক্ত সময়ৰ ১০৩ নম্বৰ মিনিটত গ’ল দি স্ক’ৰ ২-১ কৰে।

অৱশ্যে কেপ ভাৰ্ডে দুবাৰকৈ সুন্দৰ প্ৰত্যাৱৰ্তন কৰে। চিডনী লোপেচ কেব্ৰালে প্ৰথমটো সমতা স্থাপনকাৰী গ’ল কৰাৰ বিপৰীতে ডেৰয় দুৱাৰ্টেই দ্বিতীয়টো সমতা স্থাপনকাৰী গ’ল দি দক্ষিণ ফ্ল’ৰিডাত উপস্থিত থকা বুজন সংখ্যক আৰ্জেণ্টিনাৰ সমৰ্থকক আচৰিত কৰি তোলে।

এতিয়া ৰাউণ্ড অব-১৬ত আৰ্জেণ্টিনাৰ মুখামুখি হ’ব ইজিপ্তৰ । ইজিপ্তে ইয়াৰ পূৰ্বে অষ্ট্ৰেলিয়াক পেনাল্টি শ্বুটআউটত পৰাস্ত কৰি পৰৱৰ্তী ৰাউণ্ডলৈ যোগ্যতা অৰ্জন কৰিছিল। অহা মঙলবাৰে আটলান্টাত দুয়োটা দলৰ মাজত এই খেলখন অনুষ্ঠিত হ’ব।

পৰাজয়ৰ পিছতো কেপ ভাৰ্ডে নিজৰ প্ৰথমটো বিশ্বকাপতে এক স্মৰণীয় প্ৰদৰ্শন দাঙি ধৰে। পশ্চিম আফ্ৰিকাৰ উপকূলৰ ওচৰত অৱস্থিত এই সৰু দ্বীপৰাষ্ট্ৰখনে ইতিহাস ৰচনা কৰি নকআউট পৰ্যায়ত স্থান লাভ কৰিবলৈ সক্ষম হয়। ৪০ বছৰীয়া গ’লৰক্ষক ওজিনহাৰ চমকপ্ৰদ গ’লকিপিং আছিল ইয়াৰ আটাইতকৈ ডাঙৰ কাৰণ।

কেপ ভাৰ্ডে গ্ৰুপ পৰ্যায়ত স্পেইন, উৰুগুৱে আৰু চৌদি আৰৱৰ দৰে শক্তিশালী দলসমূহৰ বিৰুদ্ধে খেল ড্ৰ’ খেলি সকলোকে আচৰিত কৰি দিছিল। আৰ্জেণ্টিনাৰ বিৰুদ্ধেও ওজিনহাই ১০ টা সুন্দৰ ছেভ কৰে, য’ত মেছীৰ পাঁচটাকৈ প্ৰয়াসো অন্তৰ্ভুক্ত আছিল।

লগতে পঢ়ক: ‘তেওঁ শচীন আৰু বিৰাটৰ দৰেই প্ৰতিভাশালী’; বৈভৱ সূৰ্যৱংশীক লৈ কপিল দেবৰ বিশেষ মন্তব্য