দুদিনীয়া ভ্ৰমণসূচীৰে সোমবাৰে জৰ্ডানৰ ৰাজধানী অম্মানত উপস্থিত হয় প্ৰধানমন্ত্ৰী মোদী । বিমানবন্দৰত তেওঁক দেশখনৰ প্ৰধানমন্ত্ৰীয়ে উষ্ম আদৰণি জনায় ।
আজিৰ পৰা প্ৰধানমন্ত্ৰী নৰেন্দ্ৰ মোদীৰ তিনিখন দেশৰ এক গুৰুত্বপূৰ্ণ ভ্ৰমণ আৰম্ভ হৈছে । ভ্ৰমণৰ প্ৰথম কাৰ্যসূচী হিচাপে তেওঁ সোমবাৰে জৰ্ডানত উপস্থিত হয় । বৈদেশিক পৰিক্ৰমা মন্ত্ৰালয়ৰ তথ্য অনুসৰি এই ভ্ৰমণে পশ্চিম এছিয়া আৰু আফ্ৰিকাৰ সৈতে ভাৰতৰ সম্পৰ্ক সুদৃঢ় কৰিব । এই সময়চোৱাত বাণিজ্য, বিনিয়োগ, কৌশলগত সহযোগিতা আৰু আঞ্চলিক বিষয়সমূহৰ ওপৰত গভীৰ আলোচনা কৰা হ’ব ।
অম্মানত প্ৰধানমন্ত্ৰী মোদীক উষ্ম আদৰণি-
জৰ্ডানৰ ৰাজধানী অম্মানত উপস্থিত হোৱাৰ লগে লগে প্ৰধানমন্ত্ৰী নৰেন্দ্ৰ মোদীক আনুষ্ঠানিকভাৱে আদৰণি জনোৱা হয় । জৰ্ডানৰ প্ৰধানমন্ত্ৰী জাফৰ হাছানে তেওঁক বিমানবন্দৰত আদৰণি জনায় । বিশ্বৰ ভূ-ৰাজনৈতিক অস্থিৰতা বৃদ্ধি পোৱাৰ সময়তে এই ভ্ৰমণ দেশখনলৈ এই ভ্ৰমণ কৰিছে প্ৰধানমন্ত্ৰীয়ে । এই ভ্ৰমণৰ জৰিয়তে ভাৰতে নিজৰ বিশ্বাসযোগ্য অংশীদাৰসকলৰ সৈতে ৰাজনৈতিক, অৰ্থনৈতিক আৰু কূটনৈতিক সহযোগিতাক আগুৱাই নিয়াৰ লক্ষ্য ৰাখিছে । তাৎপৰ্যপূৰ্ণভাৱে এইটোৱেই হৈছে প্ৰধানমন্ত্ৰী নৰেন্দ্ৰ মোদীৰ জৰ্ডানলৈ প্ৰথম সম্পূৰ্ণ দ্বিপাক্ষিক ভ্ৰমণ ।
ৰজা আব্দুল্লাৰ সৈতে আলোচনাত মিলিত হ’ব প্ৰধানমন্ত্ৰী মোদী-
জৰ্ডানত ৰজা দ্বিতীয় আব্দুল্লাৰ সৈতে আলোচনাত মিলিত হ’ব প্ৰধানমন্ত্ৰী নৰেন্দ্ৰ মোদী । ইয়াৰ পিছত প্ৰতিনিধি পৰ্যায়ৰ আলোচনা অনুষ্ঠিত হ’ব । ভাৰত আৰু জৰ্ডানৰ কূটনৈতিক সম্পৰ্কৰ ৭৫ বছৰ সম্পূৰ্ণ হোৱাৰ বাবে এই ভ্ৰমণ বিশেষ বুলি বিবেচিত হৈছে । দুয়োখন দেশৰ মাজত বাণিজ্য, বিনিয়োগ আৰু ৰাজনৈতিক সহযোগিতাৰ ওপৰত গুৰুত্ব আৰোপ কৰা হ’ব ।
বাণিজ্য আৰু জনসাধাৰণৰ সম্পৰ্কত গুৰুত্ব-
এই ভ্ৰমণৰ দ্বিতীয় দিনা প্ৰধানমন্ত্ৰী মোদী আৰু ৰজা আব্দুল্লাই ভাৰত-জৰ্ডান ব্যৱসায়িক মঞ্চত ভাষণ দিব, য’ত দুয়োখন দেশৰ আগশাৰীৰ ব্যৱসায়িক নেতাসকলে অংশগ্ৰহণ কৰিব । জৰ্ডানত ভাৰতীয় সম্প্ৰদায়ৰ সৈতেও বৈঠকত মিলিত হ’ব প্ৰধানমন্ত্ৰী মোদী । ক্ৰাউন প্ৰিন্সৰ সৈতে তেওঁ ভাৰতৰ সৈতে প্ৰাচীন বাণিজ্যিক সম্পৰ্কৰ প্ৰতীক পেট্ৰা চহৰ ভ্ৰমণ কৰিব ।
লগতে পঢ়ক : তিনিখন দেশ ভ্ৰমণলৈ ৰাওনা প্ৰধানমন্ত্ৰী মোদী, বহু গুৰুত্বপূৰ্ণ বিষয়ত হ’ব আলোচনা
