আজিৰে পৰা তিনিখন দেশ ভ্ৰমণলৈ ৰাওনা হৈছে প্ৰধানমন্ত্ৰী মোদী । জৰ্ডানৰ পৰা আৰম্ভ হ’ব প্ৰধানমন্ত্ৰীগৰাকীৰ এই ভ্ৰমণ ।
সোমবাৰে প্ৰধানমন্ত্ৰী নৰেন্দ্ৰ মোদীয়ে তিনিখন দেশৰ গুৰুত্বপূৰ্ণ ভ্ৰমণলৈ ৰাওনা হৈছে । এই ভ্ৰমণসূচীৰ অধীনত তেওঁ জৰ্ডান, ইথিওপিয়া আৰু ওমানলৈ লৈ যাব । বৈদেশিক পৰিক্ৰমা মন্ত্ৰালয়ৰ তথ্য অনুসৰি এই ভ্ৰমণে পশ্চিম এছিয়া আৰু আফ্ৰিকাৰ সৈতে ভাৰতৰ সম্পৰ্ক সুদৃঢ় কৰিব । এই ভ্ৰমণৰ সময়ত বাণিজ্য, বিনিয়োগ, কৌশলগত সহযোগিতা আৰু আঞ্চলিক বিষয়সমূহৰ ওপৰত গভীৰ আলোচনা অনুষ্ঠিত হ’ব ।
বিশ্বত ভূ-ৰাজনৈতিক অস্থিৰতা বৃদ্ধি পোৱাৰ সময়তে প্ৰধানমন্ত্ৰী মোদীৰ এই ভ্ৰমণ অনুষ্ঠিত হৈছে । এই ভ্ৰমণৰ জৰিয়তে ভাৰতে নিজৰ বিশ্বাসযোগ্য অংশীদাৰসকলৰ সৈতে ৰাজনৈতিক, অৰ্থনৈতিক আৰু কূটনৈতিক সহযোগিতাক আগুৱাই নিয়াৰ লক্ষ্য ৰাখিছে । তাৎপৰ্যপূৰ্ণভাৱে এইটোৱেই হ’ব প্ৰধানমন্ত্ৰী মোদীৰ জৰ্ডান আৰু ইথিওপিয়ালৈ প্ৰথম সম্পূৰ্ণ দ্বিপাক্ষিক ভ্ৰমণ, আনহাতে এইটোৱেই হ’ব তেওঁৰ দ্বিতীয়টো ওমান ভ্ৰমণ ।
জৰ্ডানৰ পৰা আৰম্ভ হ’ব এই ভ্ৰমণ-
১৫ ডিচেম্বৰত জৰ্ডানৰ ৰাজধানী আম্মানত উপস্থিত হ’ব প্ৰধানমন্ত্ৰী মোদী । তাত তেওঁ ৰজা দ্বিতীয় আব্দুল্লাৰ সৈতে বৈঠকত মিলিত হ’ব । ইয়াৰ পিছত প্ৰতিনিধি পৰ্যায়ৰ আলোচনা অনুষ্ঠিত হ’ব । ভাৰত আৰু জৰ্ডানৰ কূটনৈতিক সম্পৰ্কৰ ৭৫ বছৰ সম্পূৰ্ণ হোৱাৰ বাবে এই ভ্ৰমণ বিশেষ বুলি বিবেচিত হৈছে । দুয়োখন দেশৰ মাজত বাণিজ্য, বিনিয়োগ আৰু ৰাজনৈতিক সহযোগিতাৰ ওপৰত গুৰুত্ব আৰোপ কৰা হ’ব ।
বাণিজ্য আৰু জনসাধাৰণৰ সম্পৰ্কৰ ওপৰত গুৰুত্ব-
এই ভ্ৰমণৰ দ্বিতীয় দিনা প্ৰধানমন্ত্ৰী মোদী আৰু ৰজা আব্দুল্লাই ভাৰত-জৰ্ডান ব্যৱসায়িক মঞ্চত ভাষণ দিব, য’ত দুয়োখন দেশৰ আগশাৰীৰ ব্যৱসায়িক নেতাসকলে অংশগ্ৰহণ কৰিব । জৰ্ডানত ভাৰতীয় সম্প্ৰদায়ৰ সৈতেও বৈঠকত মিলিত হ’ব প্ৰধানমন্ত্ৰী মোদী । ক্ৰাউন প্ৰিন্সৰ সৈতে তেওঁ ভাৰতৰ সৈতে প্ৰাচীন বাণিজ্যিক সম্পৰ্কৰ প্ৰতীক পেট্ৰা চহৰ ভ্ৰমণ কৰিব ।
ইথিওপিয়াত আফ্ৰিকান এজেণ্ডাৰ ওপৰত আলোচনা-
জৰ্ডান ভ্ৰমণৰ পিছত ১৬ ডিচেম্বৰৰ পৰা ১৭ ডিচেম্বৰলৈ ইথিওপিয়া ভ্ৰমণলৈ যাব প্ৰধানমন্ত্ৰী মোদী । ইথিওপিয়ালৈ তেওঁৰ এইটোৱেই হ’ব প্ৰথম ভ্ৰমণ । প্ৰধানমন্ত্ৰী আবি আহমেদ আলীক সাক্ষাৎ কৰিব তেওঁ । দুয়োখন দেশৰ মাজত দ্বিপাক্ষিক সম্পৰ্কৰ বিষয়ে আলোচনা কৰা হ’ব । ইথিওপিয়াৰ সংসদৰ যৌথ অধিৱেশনতো ভাষণ দিব ভাৰতৰ প্ৰধানমন্ত্ৰীগৰাকীয়ে ।
ভাৰত-আফ্ৰিকা অংশীদাৰিত্বৰ নতুন দিশ-
ইথিওপিয়া ভ্ৰমণৰ সময়ত কেইবাখনো বুজাবুজি চুক্তি স্বাক্ষৰিত হোৱাৰ সম্ভাৱনা আছে । ভাৰতে এই ভ্ৰমণৰ জৰিয়তে আফ্ৰিকাত দীৰ্ঘম্যাদী আৰু বিশ্বাসযোগ্য অংশীদাৰ হিচাপে নিজৰ ভূমিকা শক্তিশালী কৰাৰ লক্ষ্য লৈছে । এজেণ্ডা ২০৬৩ৰ অধীনত আফ্ৰিকাৰ অগ্ৰাধিকাৰ আৰু বিশ্বজনীন বিষয়সমূহৰ ওপৰতো আলোচনা কৰা হ’ব । ভাৰতীয় সম্প্ৰদায়ৰ সৈতেও মত বিনিময় এই ভ্ৰমণৰ এক গুৰুত্বপূৰ্ণ অংশ হ’ব ।
ওমানত বাণিজ্য চুক্তিৰ ওপৰত গুৰুত্ব-
ভ্ৰমণৰ অন্তিম পৰ্যায়ত প্ৰধানমন্ত্ৰী মোদীয়ে ১৭ ডিচেম্বৰৰ পৰা ১৮ ডিচেম্বৰলৈ ওমান ভ্ৰমণ কৰিব । এয়া হ’ব তেওঁৰ দ্বিতীয়টো ওমান ভ্ৰমণ । ভাৰত আৰু ওমানে কূটনৈতিক সম্পৰ্কৰ ৭০ বছৰ উদযাপন কৰিছে । এই ভ্ৰমণৰ সময়ত ভাৰত-ওমান সৰ্বাংগীন অৰ্থনৈতিক অংশীদাৰিত্ব চুক্তিৰ ওপৰত বিশেষ গুৰুত্ব দিয়া হ’ব । এই চুক্তিয়ে দুয়োখন দেশৰ মাজত বাণিজ্য আৰু বিনিয়োগৰ ক্ষেত্ৰত এক নতুন গতি প্ৰদান কৰিব বুলি ধাৰণা কৰা হৈছে ।
লগতে পঢ়ক : ‘মেক্সিকোৰ সিদ্ধান্ত সম্পূৰ্ণ একপক্ষীয়…’, শুল্ক বৃদ্ধিৰ বিৰুদ্ধে ভাৰতৰ তীব্ৰ আপত্তি
