প্ৰধানমন্ত্ৰী নৰেন্দ্ৰ মোদীয়ে শুকুৰবাৰে তিনিখন দেশ ভ্ৰমণৰ অন্তিম পৰ্যায়ত নিউজিলেণ্ডত উপস্থিত হয়। প্ৰধানমন্ত্ৰী গৰাকীয়ে ভাৰতীয় সমাজৰ প্ৰতি গভীৰ কৃতজ্ঞতা প্ৰকাশ কৰে ।
প্ৰধানমন্ত্ৰী নৰেন্দ্ৰ মোদীয়ে মেলবৰ্ণৰ পৰা তিনিখন দেশ ভ্ৰমণৰ অন্তিম পৰ্যায়ত শুকুৰবাৰে নিউজিলেণ্ডত উপস্থিত হয়। প্ৰধানমন্ত্ৰী মোদীয়ে নিউজিলেণ্ডত বসবাস কৰা ভাৰতীয়সকলৰ মৰম, আপোনত্ব আৰু ভাৰতৰ সৈতে থকা তেওঁলোকৰ এৰাব নোৱাৰা সম্পৰ্কক আন্তৰিকতাৰে প্ৰশংসা কৰে। বিগত ৪০ বছৰত কোনো ভাৰতীয় প্ৰধানমন্ত্ৰীৰ এয়া প্ৰথমটো চৰকাৰী নিউজিলেণ্ড ভ্ৰমণ।
হোটেলত উপস্থিত হোৱাৰ লগে লগে নিউজিলেণ্ডত থকা ভাৰতীয় সম্প্ৰদায়ৰ লোকসকলে তেওঁক উষ্ম আদৰণি জনায়। প্ৰধানমন্ত্ৰী মোদীৰ আদৰণি অনুষ্ঠানত সমগ্ৰ ভাৰতৰ শাস্ত্ৰীয় সংগীত আৰু নৃত্য পৰম্পৰাৰ এক সুন্দৰ প্ৰদৰ্শন দাঙি ধৰা হয়, যিয়ে দেশখনৰ চহকী সাংস্কৃতিক ঐতিহ্য আৰু বৈচিত্ৰ্যক প্ৰতিফলিত কৰে।
প্ৰৱাসী ভাৰতীয়ৰ আপোনত্বৰ পিছতেই প্ৰধানমন্ত্ৰী মোদীয়ে ছচিয়েল মিডিয়া প্লেটফৰ্ম ‘এক্স’ত পোষ্ট কৰি লিখিছে, ”নিউজিলেণ্ডত বসবাস কৰা ভাৰতীয় সম্প্ৰদায়ৰ মৰম আৰু আপোনত্বই মোৰ হৃদয় স্পৰ্শ কৰি গৈছে। তেওঁলোকে চাৰিটা দশক ধৰি এগৰাকী ভাৰতীয় প্ৰধানমন্ত্ৰীৰ ভ্ৰমণলৈ অপেক্ষা কৰিছিল, আৰু আজি তেওঁলোকৰ উৎসাহ আৰু আগ্ৰহ স্পষ্টকৈ দেখা গৈছিল। ভাৰতৰ সৈতে তেওঁলোকৰ সম্পৰ্ক আজিও সমানেই শক্তিশালী আৰু অটুট আছে।”
ইয়াৰ পূৰ্বে নিউজিলেণ্ডৰ প্ৰধানমন্ত্ৰী ক্ৰিষ্টোফাৰ লাক্সনে বিমানবন্দৰত প্ৰধানমন্ত্ৰী মোদীক সাৱটি ধৰি আদৰণি জনায়। এই সময়ছোৱাত নিউজিলেণ্ডত ভাৰতৰ উচ্চায়ুক্ত মুৱানপুই ছাইয়াবীৰ লগতে নিউজিলেণ্ডৰ কেইবাগৰাকীও বিষয়া উপস্থিত আছিল। প্ৰধানমন্ত্ৰী লাক্সনে বিমানবন্দৰত প্ৰধানমন্ত্ৰী মোদীক আদৰণি জনোৱাৰ এটা ভিডিঅ’ শ্বেয়াৰ কৰি ছচিয়েল মিডিয়া প্লেটফৰ্ম ‘এক্স’ত লিখিছে, “প্ৰধানমন্ত্ৰী নৰেন্দ্ৰ মোদী, নিউজিলেণ্ডলৈ আপোনাক স্বাগতম।”
আনহাতে, প্ৰধানমন্ত্ৰী মোদীয়েও ছচিয়েল মিডিয়া প্লেটফৰ্ম ‘এক্স’ত উষ্ম আদৰণিৰ বাবে প্ৰধানমন্ত্ৰী লাক্সনক ধন্যবাদ জ্ঞাপন কৰে। প্ৰধানমন্ত্ৰী মোদীয়ে তেওঁৰ অকলেণ্ড ভ্ৰমণক ‘ঐতিহাসিক’ বুলি অভিহিত কৰে আৰু কয় যে তেওঁ লাক্সনৰ সৈতে দ্বিপাক্ষিক সম্পৰ্কৰ সন্দৰ্ভত আলোচনা কৰিবলৈ আগ্ৰহী।
লগতে পঢ়ক: ভাৰত এৰি ডিচেম্বৰত ঘূৰি যাব বাংলাদেশলৈ! শ্বেখ হাছিনাৰ বিস্ফোৰক ঘোষণা
