ৰাজ্যৰ উচ্চ শিক্ষানুষ্ঠানসমূহৰ আধুনিকীকৰণৰ বাবে ২০২৬-২৭ বৰ্ষৰ বাজেটত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হৈছে।
অসমৰ উচ্চশিক্ষা খণ্ডৰ সৰ্বাংগীণ উন্নয়নৰ বাবে এক ঐতিহাসিক পদক্ষেপ গ্ৰহণ কৰিছে ৰাজ্য চৰকাৰে । চলিত বৰ্ষৰ বাজেটত উচ্চশিক্ষাৰ আন্তঃগাঁথনি শক্তিশালী কৰাৰ উদ্দেশ্যে মুঠ ১,৭৫০ কোটি টকাৰ এক অভিলাষী পুঁজিৰ প্ৰস্তাৱ কৰা হৈছে । ইয়াৰ উপৰিও ৰাজ্যৰ স্বায়ত্ত্বশাসিত মহাবিদ্যালয়সমূহলৈ আৰ্থিক সাহায্য বৃদ্ধি, ‘গুৰু দক্ষিণা’ আঁচনিৰ সম্প্ৰসাৰণ আৰু যোগ্য ভেঞ্চাৰ শিক্ষানুষ্ঠানসমূহৰ প্ৰাদেশীকৰণ প্ৰক্ৰিয়া ক্ষিপ্ৰতাৰে আগবঢ়াই নিয়াৰ সিদ্ধান্ত লোৱা হৈছে ।
বিশ্ববিদ্যালয়সমূহৰ আন্তঃগাঁথনি উন্নয়নত অভিলেখ ধন
ৰাজ্যৰ উচ্চ শিক্ষানুষ্ঠানসমূহৰ আধুনিকীকৰণৰ বাবে বিত্তমন্ত্ৰীগৰাকীয়ে কেইবাখনো বিশ্ববিদ্যালয়লৈ বিশেষ বিত্তীয় অনুদান ঘোষণা কৰে । নতুন প্ৰস্তাৱ অনুসৰি, শিৱসাগৰ বিশ্ববিদ্যালয়, জগন্নাথ বৰুৱা বিশ্ববিদ্যালয়, নগাঁও বিশ্ববিদ্যালয়, উত্তৰ লখিমপুৰ বিশ্ববিদ্যালয়, কোকৰাঝাৰ বিশ্ববিদ্যালয়, বঙাইগাঁও বিশ্ববিদ্যালয় আৰু গুৰুচৰণ বিশ্ববিদ্যালয়ক পৰ্যায়ক্ৰমে ১০০ কোটি টকাকৈ প্ৰদান কৰা হ’ব ।
একেদৰে, মাধৱদেৱ বিশ্ববিদ্যালয়, ভট্টদেৱ বিশ্ববিদ্যালয়, ৰবীন্দ্ৰনাথ ঠাকুৰ বিশ্ববিদ্যালয়, বীৰাংগনা সতী সাধনী ৰাজ্যিক বিশ্ববিদ্যালয়, অসম মহিলা বিশ্ববিদ্যালয়, কুমাৰ ভাস্কৰ বৰ্মা সংস্কৃত আৰু পুৰাতন অধ্যয়ন বিশ্ববিদ্যালয় আৰু মাজুলী সাংস্কৃতিক বিশ্ববিদ্যালয়ৰ আন্তঃগাঁথনিৰ বাবে ৫০ কোটি টকাকৈ আৱণ্টন দিয়া হৈছে । ইয়াৰ উপৰি চলিত বৰ্ষত গুৱাহাটী বিশ্ববিদ্যালয়লৈ ১০০ কোটি টকা আগবঢ়োৱা হৈছে । উল্লেখ্য যে ডিব্ৰুগড় বিশ্ববিদ্যালয়ে ইতিমধ্যে একে পৰিমাণৰ পুঁজি লাভ কৰিছে ।
বাজেটত এক গুৰুত্বপূৰ্ণ ঘোষণা কৰি বিত্তমন্ত্ৰী বৰুৱাই কয় যে মাজুলী সাংস্কৃতিক বিশ্ববিদ্যালয়ক কেৱল সাংস্কৃতিক চৰ্চাতে সীমাবদ্ধ নাৰাখি, ইয়াক এক পূৰ্ণাংগ ৰূপ দিয়া হ’ব । এতিয়াৰে পৰা এই বিশ্ববিদ্যালয়খনত বিজ্ঞান আৰু কলা শাখাও অন্তৰ্ভুক্ত কৰা হ’ব, যাৰ ফলত ছাত্ৰ-ছাত্ৰীসকলে ব্যাপকভাৱে উপকৃত হ’ব ।
স্বায়ত্ত্বশাসিত মহাবিদ্যালয়সমূহলৈ ২ কোটি টকাকৈ সাহায্য
ৰাজ্যৰ মহাবিদ্যালয়সমূহৰ গুণগত মানদণ্ড বৃদ্ধিৰ দিশতো বাজেটত বিশেষ গুৰুত্ব প্ৰদান কৰা হৈছে । বিত্তমন্ত্ৰীয়ে সদনত জানিবলৈ দিয়ে যে বিশ্ববিদ্যালয় অনুদান আয়োগে শেহতীয়াকৈ অসমৰ ২৭ খন মহাবিদ্যালয়ক স্বায়ত্ত্বশাসিত মৰ্যাদা প্ৰদান কৰিছে । এই নতুন স্বায়ত্ত্বশাসিত মহাবিদ্যালয়সমূহৰ শৈক্ষিক আৰু প্ৰতিষ্ঠানিক বিকাশ সুনিশ্চিত কৰিবলৈ চৰকাৰে প্ৰতিখন মহাবিদ্যালয়ক দুটা সমান কিস্তিত মুঠ ২ কোটি টকাকৈ বিশেষ সাহায্য প্ৰদান কৰিব ।
শিক্ষক কল্যাণ আৰু ‘গুৰু দক্ষিণা’ আঁচনি
শিক্ষকসকলৰ কল্যাণৰ বাবে চৰকাৰে আৰম্ভ কৰা ‘গুৰু দক্ষিণা’ আঁচনিৰ ব্যাপক সম্প্ৰসাৰণ কৰা হৈছে । বিত্তমন্ত্ৰী জয়ন্ত মল্ল বৰুৱাই জনোৱা মতে, নিম্ন প্ৰাথমিক, উচ্চ প্ৰাথমিক, হাইস্কুল, উচ্চতৰ মাধ্যমিক বিদ্যালয় আৰু ডিগ্ৰী মহাবিদ্যালয়ৰ ১৫,০০০ তকৈও অধিক শিক্ষকে ইতিমধ্যে এই আঁচনিৰ অধীনত আবেদন কৰিছে । শিক্ষা বিভাগে অতি সোনকালে এই আবেদনসমূহ পৰীক্ষা কৰি শিক্ষকসকলক প্ৰদান কৰিবলগীয়া আৰ্থিক সাহায্যৰ পৰিমাণ চূড়ান্ত কৰিব ।
ভেঞ্চাৰ মহাবিদ্যালয়ৰ প্ৰাদেশীকৰণ আৰু আইন সংশোধন
অসমৰ ভেঞ্চাৰ শিক্ষানুষ্ঠানসমূহত কৰ্মৰত শিক্ষক-কৰ্মচাৰীসকলৰ বাবেও এই বাজেটত আছে এক ডাঙৰ সুখবৰ । ভেঞ্চাৰ শিক্ষানুষ্ঠানসমূহৰ প্ৰাদেশীকৰণৰ বাবে চৰকাৰে প্ৰায় ৮,০০০ আবেদন লাভ কৰিছে । বিত্তমন্ত্ৰীয়ে আশ্বাস দিয়ে যে চৰকাৰে যোগ্য সকলো ভেঞ্চাৰ মহাবিদ্যালয় আৰু শিক্ষানুষ্ঠানৰ প্ৰাদেশীকৰণ প্ৰক্ৰিয়া পূৰ্বৰ দৰেই অব্যাহত ৰাখিব ।
আটাইতকৈ গুৰুত্বপূৰ্ণ কথাটো হ’ল, চৰকাৰে ‘অসম শিক্ষা (শিক্ষকৰ সেৱা প্ৰাদেশীকৰণ আৰু শিক্ষানুষ্ঠানৰ পুনৰ সংগঠন) আইন’ সংশোধন কৰাৰ সিদ্ধান্ত লৈছে । এই সংশোধনৰ জৰিয়তে প্ৰাদেশীকৰণৰ কৃতিচিহ্নিত তাৰিখ বা কাট-অফ ডেট সলনি কৰা হ’ব, যাৰ ফলত বহু বছৰ ধৰি বঞ্চিত হৈ থকা বহু সংখ্যক শিক্ষক আৰু টিউটৰ নতুনকৈ প্ৰাদেশীকৰণৰ বাবে যোগ্য বিবেচিত হ’ব । চৰকাৰৰ এই ঐতিহাসিক পদক্ষেপে ৰাজ্যৰ শিক্ষা খণ্ডত এক নতুন যুগৰ সূচনা কৰিব বুলি আশা কৰা হৈছে ।
লগতে পঢ়ক: পথ আৰু দলঙৰ বাবে বাজেটত কি কি ঘোষণা ?
