ৰাজ্যিক বাজেট উত্থাপন কৰি বিধানসভাত এক অভিলাষী আন্তঃগাঁথনিমূলক ৰোডমেপ ঘোষণা কৰিলে ৰাজ্যৰ বিত্তমন্ত্ৰী জয়ন্ত মল্ল বৰুৱাই
২০২৬-২৭ বৰ্ষৰ ৰাজ্যিক বাজেট উত্থাপন কৰি বিধানসভাত এক অভিলাষী আন্তঃগাঁথনিমূলক ৰোডমেপ ঘোষণা কৰিলে ৰাজ্যৰ বিত্তমন্ত্ৰী জয়ন্ত মল্ল বৰুৱাই । অসম চৰকাৰে যোগাযোগ ব্যৱস্থা অধিক শক্তিশালী কৰাৰ লক্ষ্যৰে ১০,০০০ কোটি টকা বিনিয়োগেৰে ‘অসম মালা ৪.০’ আঁচনি আৰম্ভ কৰাৰ কথা ঘোষণা কৰিছে । ইয়াৰ অধীনত অহা ৫ বছৰত ৰাজ্যত ৮০০ কিলোমিটাৰ উচ্চমানৰ পথ নিৰ্মাণ কৰা হ’ব । ইয়াৰ উপৰি কেন্দ্ৰীয় চৰকাৰৰ সহযোগত প্ৰায় ৫৫,০০০ কোটি টকাতকৈও অধিক মূল্যৰ কেইবাটাও মেগা প্ৰকল্পৰ কামো বৰ্তমান ৰাজ্যত চলি আছে বুলি মন্ত্ৰীগৰাকীয়ে সদৰী কৰে ।
কেন্দ্ৰ-ৰাজ্যৰ যৌথ উদ্যোগত ৫৫,০০০ কোটি টকাৰ মেগা প্ৰকল্প
কেন্দ্ৰীয় চৰকাৰৰ সহযোগত অসমত বৰ্তমান কেইবাটাও গুৰুত্বপূৰ্ণ মেগা প্ৰকল্পৰ কাম ক্ষিপ্ৰতাৰে চলি আছে । ইয়াৰ ভিতৰত আটাইতকৈ ব্যয়বহুল প্ৰকল্পটো হৈছে ২২,৮৬৪ কোটি টকীয়া গ্ৰীণফিল্ড চিলচৰ হাই-স্পীড কৰিডৰ । এই কৰিডৰটো সম্পূৰ্ণ হ’লে গুৱাহাটী আৰু চিলচৰৰ মাজৰ ভ্ৰমণৰ সময় বৰ্তমানৰ ৮ ঘণ্টা ৩০ মিনিটৰ পৰা প্ৰায় ৫ ঘণ্টালৈ হ্ৰাস পাব ।
ইয়াৰ উপৰি ১৮,৬৬২ কোটি টকা ব্যয়েৰে নিৰ্মাণ হ’বলগীয়া গহপুৰ-নুমলীগড় ব্ৰহ্মপুত্ৰ টানেল (সুৰংগ) আৰু ১৩,৮১২ কোটি টকীয়া বাইহাটা চাৰিআলি-মিছন চাৰিআলি-তেজপুৰৰ চাৰি লেনযুক্ত পথৰ কামো এই যৌথ উদ্যোগৰ অন্যতম বৃহৎ সংযোজন । সমান্তৰালভাৱে, ৬,৯৫৭ কোটি টকাৰ কাজিৰঙা এলিভেটেড কৰিডৰ, ৪,৯৫৪ কোটি টকাৰ গুৱাহাটী ৰিং ৰোড, আৰু ৩,৪২৩ কোটি টকাৰ গুৱাহাটী বিমানবন্দৰ-জালুকবাৰী এলিভেটেড কৰিডৰৰ কামো চলি আছে । লগতে মৰিগাঁও আৰু দৰঙক সংযোগ কৰাকৈ ব্ৰহ্মপুত্ৰৰ ওপৰত আন এখন নতুন দলঙৰ কাম চৰকাৰে হাতত লৈছে ।
ব্ৰহ্মপুত্ৰৰ দলংসমূহৰ অগ্ৰগতি আৰু নতুন লক্ষ্য
ৰাজ্যৰ দলং আন্তঃগাঁথনিৰ ওপৰত আলোকপাত কৰি বিত্তমন্ত্ৰীয়ে কেইবাটাও গুৰুত্বপূৰ্ণ আপডেট প্ৰদান কৰে:
মাজুলী-যোৰহাট দলং: ১,৪০০ কোটি টকা ব্যয়েৰে নিৰ্মীয়মাণ এই দলংখন অহা ২০২৭ চনৰ ডিচেম্বৰৰ ভিতৰত সম্পূৰ্ণ হ’ব বুলি আশা কৰা হৈছে, যাৰ ফলত মাজুলীৰ সৈতে মূল ভূখণ্ডৰ বাৰটমহীয়া সংযোগ সম্ভৱ হ’ব ।
পলাশবাৰী-শুৱালকুছি দলং: ৩,১৯৭ কোটি টকীয়া এই প্ৰকল্পটোৰ ইতিমধ্যে ৪৯ শতাংশ ভৌতিক কাম সম্পূৰ্ণ হৈছে ।
ধুবুৰী-ফুলবাৰী দলং: ৪,৯৯৭ কোটি টকীয়া এই দেশৰ অন্যতম দীঘল দলংখনৰ নিৰ্মাণ কাৰ্য ৭৭ শতাংশতকৈও অধিক সম্পূৰ্ণ হৈছে । এই দলংখনে ধুবুৰী আৰু ফুলবাৰীৰ মাজৰ ২৬০ কিলোমিটাৰ দূৰত্ব মাত্ৰ ২০ কিলোমিটাৰলৈ হ্ৰাস কৰিব ।
বৰাক নদীৰ নতুন দলং: ‘সেতু বন্ধন’ আঁচনিৰ অধীনত চিলচৰ চহৰৰ মধূৰামুখক সংযোগ কৰাকৈ গান্ধীঘাটত বৰাক নদীৰ ওপৰত এখন নতুন দলং মঞ্জুৰ কৰা হৈছে ।
চৰকাৰৰ দীৰ্ঘম্যাদী লক্ষ্য: বিত্তমন্ত্ৰীয়ে পুনৰ দোহাৰে যে অসম চৰকাৰৰ মূল লক্ষ্য হৈছে ৰাজ্যৰ প্ৰতিখন জিলাতে ব্ৰহ্মপুত্ৰ নদীৰ ওপৰত অন্ততঃ এখনকৈ দলং নিশ্চিত কৰা ।
ভৱিষ্যতৰ হাই-স্পীড কৰিডৰ আৰু উমৰাংচু ৰেলৱে প্ৰকল্প
বাজেটত ভৱিষ্যতৰ যোগাযোগ ব্যৱস্থাৰ বাবে আৰু দুটা ডাঙৰ প্ৰৱেশ-নিয়ন্ত্ৰিত কৰিডৰ ক্ৰমে বৰাপানী-গুৱাহাটী আৰু গুৱাহাটী-শিলিগুৰিৰ সংৰেখন আৰু প্ৰকল্প প্ৰস্তুতিৰ কাম আৰম্ভ কৰাৰ কথা ঘোষণা কৰা হৈছে । ভৱিষ্যতৰ যোগাযোগ ব্যৱস্থা অধিক শক্তিশালী কৰাৰ বাবে অতিৰিক্ত হাই-স্পীড পথ প্ৰকল্পৰ বিতং প্ৰকল্প প্ৰতিবেদন চৰকাৰে প্ৰস্তুত কৰিব ।
আনহাতে, পাৰ্বত্য জিলাৰ অৰ্থনৈতিক উন্নয়নৰ বাবে লংকুলাৰ পৰা উমৰাংচুলৈ ১৫.৮৭ কিলোমিটাৰ দৈৰ্ঘ্যৰ এক নতুন ব্ৰডগজ ৰেললাইনৰ প্ৰস্তাৱ কৰা হৈছে । ১,০৮৪ কোটি টকা আনুমানিক ব্যয়ৰ এই প্ৰকল্পটোৰ বিতং প্ৰকল্প প্ৰতিবেদন ইতিমধ্যে ২০২৬ চনৰ জুন মাহত ৰেলৱে ব’ৰ্ডৰ ওচৰত দাখিল কৰা হৈছে ।
লগতে পঢ়ক : অসম বাজেট ২০২৬: ১০ বছৰত ৩ গুণ বৃদ্ধি পালে ৰাজ্যৰ বাজেটৰ আকাৰ
