জনগাঁথনি পৰিৱৰ্তনক লৈ মুখ্যমন্ত্ৰীৰ ভয়ংকৰ তথ্য
ৰাজ্যৰ জনগাঁথনি পৰিৱৰ্তনক লৈ মুখ্যমন্ত্ৰী ড০ হিমন্ত বিশ্ব শৰ্মাই উদঙালে ভয়ংকৰ তথ্য । কেৱল জনসংখ্যাই নহয় অৰ্থনৈতিক সম্পদতো দ্ৰুতগতিত পৰিৱৰ্তন হোৱা বুলি উল্লেখ কৰে মুখ্যমন্ত্ৰীগৰাকীয়ে । দেওবাৰে অনুষ্ঠিত হোৱা কেবিনেট বৈঠকৰ অন্তত সংবাদ মাধ্যমৰ আগত দিয়া মন্তব্যত তেওঁ ২০০১ চনৰ পৰা ২০১১ চনৰ ভিতৰত অসমত মুছলমান জনসংখ্যা কেনেদৰে বৃদ্ধি পালে তাৰ ওপৰত আলোকপাত কৰে । মুখ্যমন্ত্ৰী হিমন্ত বিশ্ব শৰ্মাই কয় যে ২০০১ চনৰ পৰা ২০১১ চনৰ ভিতৰত ৰাজ্যখনৰ হিন্দু আৰু মুছলমান সম্প্ৰদায়ৰ বৃদ্ধিৰ পৰিসংখ্যা যথেষ্ট উদ্বেগজনক । ৰাজ্যৰ সকলো ঠাইতে ক্ৰমাৎ বৃদ্ধি পাইছে মুছলমান জনসংখ্যা । একে সময়তে হিন্দু জনসংখ্যা বৃদ্ধি সকলোতে কমি আহিছে । অসমৰ প্ৰতিটো ব্লকতে মুছলমান জনসংখ্যা বৃদ্ধি পাইছে বুলি কয় তেওঁ ।
মুখ্যমন্ত্ৰীগৰাকীয়ে জনগাঁথনিৰ পৰিৱৰ্তন কেৱল সংখ্যাত নহয় সম্পদতো হৈছে বুলি উল্লেখ কৰে । তেওঁ কয় যে, সংখ্যা আৰু সম্পদ দুয়োটাতে জনগাঁথনি পৰিৱৰ্তন হৈছে । সম্পদ পৰিৱৰ্তন মানেই হৈছে ধ্বংসৰ ইংগিত । অসমৰ অৰ্থনৈতিক সম্পদত দ্ৰুতগতিত পৰিৱৰ্তন হৈছে । একপ্ৰকাৰ অসমীয়া মানুহৰ আত্মসমৰ্পণৰ অধ্যায় আৰম্ভ হৈছে বুলি কয় মুখ্যমন্ত্ৰিী ড০ শৰ্মাই ।
মুখ্যমন্ত্ৰী ড০ শৰ্মাই কয় যে এই কাৰণেই চৰকাৰে কঠোৰ ব্যৱস্থা গ্ৰহণ কৰিছে । বহুবিবাহৰ পিছত এতিয়া ৰাজ্য চৰকাৰে মাটি বিক্ৰীৰ অনুমতিৰ তদন্তও আৰম্ভ কৰিছে । ইয়াৰ দ্বাৰা ৰাজ্যৰ এটা বিশেষ সম্প্ৰদায়ক কেনেকৈ মাটি বিক্ৰী কৰা হৈছে তাৰেই তদন্ত কৰা হ’ব বুলি উল্লেখ কৰে তেওঁ ।
উল্লেখ্য যে, অসম চৰকাৰে দীৰ্ঘদিন ধৰি মুছলমান সম্প্ৰদায়ে ৰাজ্যত আগ্ৰাসনৰ অভিযোগ উত্থাপন কৰি আহিছে । এই সন্দৰ্ভত মুখ্যমন্ত্ৰী হিমন্ত বিশ্ব শৰ্মাই ধাৰাবাহিকভাৱে আগ্ৰাসী পদক্ষেপ গ্ৰহণ কৰি আহিছে । অসমৰ পৰিসংখ্যা অনুসৰি ২০১১ চনৰ লোকপিয়লত ১ কোটি ২৪ লাখ মুছলমান পোৱা গৈছিল । তদুপৰি ৰাজ্যখনৰ ১১খনতকৈও অধিক জিলা মুছলমান সংখ্যাগৰিষ্ঠ আছিল । কিন্তু বিগত দহ বছৰত এই সংখ্যা ১ কোটি ৪০ লাখলৈ বৃদ্ধি পাইছে ।
লগতে পঢ়ক : অন্ন সেৱা আঁচনিৰ শুভাৰম্ভ; ১১৭ টকাতে লাভ কৰিব দালি, চেনি আৰু নিমখ
