প্ৰথম স্থানত হিটমেন ৰোহিত শৰ্মা
অষ্ট্ৰেলিয়াৰ এদিনীয়া শৃংখলাত আকৰ্ষণীয় প্ৰদৰ্শনৰ পিছত ৰোহিত শৰ্মাই আই চি চিৰ এদিনীয়া ৰেংকিঙৰ প্ৰথম স্থান দখল কৰিছে । তেওঁ ভাৰতীয় এদিনীয়া দলৰ অধিনায়ক শুভমন গীলক অতিক্ৰম কৰি এই স্থান লাভ কৰে । ৰোহিত বিশ্বৰ প্ৰথম স্থানৰ এদিনীয়া বেটছমেন হিচাপে পৰিগণিত হোৱা আটাইতকৈ বয়সীয়াল খেলুৱৈ হিচাপে পৰিগণিত হৈছে । শেহতীয়া এদিনীয়া ৰেংকিঙত গীল আৰু ইব্ৰাহিম জাদ্ৰানক অতিক্ৰম কৰি ৭৮১ ৰেটিং পইণ্টেৰে শীৰ্ষ স্থান দখল কৰিবলৈ সক্ষম হৈছে ৰোহিত শৰ্মাই । ইফালে শুভমন গীল প্ৰথমৰ পৰা তৃতীয় স্থানলৈ অৱনমিত হৈছে ।
অষ্ট্ৰেলিয়াৰ বিৰুদ্ধে এদিনীয়া শৃংখলাত ৰোহিতে আন সকলো বেটছমেনক পিছ পেলাই সৰ্বাধিক ৰান সংগ্ৰহ কৰে । প্ৰথমখন মেচত তেওঁ ভাল প্ৰদৰ্শনত ব্যৰ্থ হ’লেও দ্বিতীয়খন এদিনীয়াত অৰ্ধশতক অৰ্জন কৰি অন্তিম মেচত শতকৰে নিজৰ দলক জয়ৰ দিশে আগুৱাই লৈ যায় । অষ্ট্ৰেলিয়াৰ বিৰুদ্ধে এদিনীয়া শৃংখলাত ৰোহিতে ১০১ গড়ে ২০২ ৰান সংগ্ৰহ কৰে । তেওঁৰ এই প্ৰদৰ্শনে তেওঁক বিশ্বৰ এদিনীয়া ৰেংকিঙত প্ৰথম স্থানলৈ আগুৱাই লৈ যায় । তেওঁৰ কেৰিয়াৰত প্ৰথমবাৰৰ বাবে প্ৰথমস্থান অধিকাৰ কৰিছে ।
বিশ্বৰ প্ৰথম স্থানৰ এদিনীয়া বেটছমেন হৈ বিশ্ব অভিলেখ গঢ়িবলৈ সক্ষম হৈছে ৰোহিত শৰ্মাই । লগ েলগে প্ৰথম স্থান দখল কৰা আটাইতকৈ বয়সীয়াল খেলুৱৈ হিচাপে পৰিগণিত হৈছে তেওঁ । ৰোহিতে ৩৮ বছৰ ১৮২ দিন বয়সত এদিনীয়া খেলত প্ৰথম স্থান অৰ্জন কৰে । ১৮ বছৰ পূৰ্বে আন্তঃৰাষ্ট্ৰীয় ক্ৰিকেটত অভিষেক ঘটোৱা ৰোহিতে এতিয়া প্ৰথমবাৰৰ বাবে ৰেংকিঙত প্ৰথম স্থান স্থান লাভ কৰিছে ।
এদিনীয়া ক্ৰিকেটত প্ৰথম স্থান অৰ্জন কৰা পঞ্চমজন ভাৰতীয় বেটছমেন ৰোহিত শৰ্মা । শচীন তেণ্ডুলকাৰে প্ৰথমে এই পদত অৰ্জন কৰিছিল । ইয়াৰ পিছত ধোনীয়ে প্ৰথম স্থান অধিকাৰ কৰিছিল । বিৰাট কোহলীয়ে দীৰ্ঘদিন ধৰি এই স্থান দখল কৰি আছিল । খুব কম সময়ৰ ভিতৰতে এদিনীয়া ৰেংকিঙত প্ৰথম স্থান অৰ্জন কৰে শুভমন গীলে । এতিয়া ৰোহিত শৰ্মাই গীলক অতিক্ৰম কৰি এই স্থান দখল কৰিছে ।
লগতে পঢ়ক : আজি ভাৰত-অষ্ট্ৰেলিয়াৰ টি ২০ শৃংখলাৰ প্ৰথমখন মেচ; মূল একাদশ গঠনত প্ৰত্যাহ্বান
