ভাৰত আৰু অষ্ট্ৰেলিয়াৰ মাজত সাক্ষৰিত প্ৰতিৰক্ষা চুক্তি
প্ৰতিৰক্ষা মন্ত্ৰী ৰাজনাথ সিং আৰু অষ্ট্ৰেলিয়াৰ উপ-প্ৰধানমন্ত্ৰী তথা প্ৰতিৰক্ষা মন্ত্ৰী ৰিচাৰ্ড মাৰ্লেছৰ উপস্থিতিত ভাৰত আৰু অষ্ট্ৰেলিয়াই গুৰুত্বপূৰ্ণ প্ৰতিৰক্ষা চুক্তিত স্বাক্ষৰ কৰিছে । উল্লেখ্য যে, দুদিনীয়া ভ্ৰমণসূচীৰে বুধবাৰে ছিডনীত উপস্থিত হয় প্ৰতিৰক্ষা মন্ত্ৰী ৰাজনাথ সিং ।
চুক্তিৰ পিছত অষ্ট্ৰেলিয়াৰ উপ-প্ৰধানমন্ত্ৰী তথা প্ৰতিৰক্ষা মন্ত্ৰী ৰিচাৰ্ড মাৰ্লেছে কয় যে, “মই ভাবো আজি তাৎপৰ্যপূৰ্ণ দিন কাৰণ আমি দেখা গভীৰ আস্থা আৰু কৌশলগত সহযোগিতা এতিয়া দুয়োটা প্ৰতিৰক্ষা বাহিনীৰ মাজত বহুত গভীৰ অপাৰেচনেল পৰ্যায়ৰ সংযোগত প্ৰকাশ পাইছে । আমাৰ অপাৰেচনেল কমাণ্ডৰ মাজত আলোচনাৰ ক্ষেত্ৰত আমি যি চুক্তিত উপনীত হৈছে সেয়া অত্যন্ত গুৰুত্বপূৰ্ণ… আমি এই বিষয়ে অতিশয় উৎসাহিত ।”
এই গুৰুত্বপূৰ্ণ প্ৰতিৰক্ষা চুক্তিৰ পিছতে দুয়োখন দেশৰ মাজত প্ৰতিৰক্ষা আৰু কৌশলগত সহযোগিতা শক্তিশালী কৰাৰ লক্ষ্যৰে এক কাৰ্যসূচীৰ অংশ হিচাপে প্ৰতিৰক্ষা মন্ত্ৰী ৰাজনাথ সিঙে অষ্ট্ৰেলিয়াৰ কেনবেৰাত উপস্থিত হয় । বিমানবন্দৰত তেওঁক আদৰণি জনায় অষ্ট্ৰেলিয়াৰ সহকাৰী প্ৰতিৰক্ষা মন্ত্ৰী পিটাৰ খলিল আৰু যৌথ অভিযানৰ মুৰব্বী ভাইচ এডমিৰেল জাষ্টিন জ’নে ।
অষ্ট্ৰেলিয়াৰ কেনবেৰাৰ সংসদ ভৱনত অষ্ট্ৰেলিয়াৰ প্ৰধানমন্ত্ৰী এণ্টনি আলবানিজ আৰু অষ্ট্ৰেলিয়াৰ উপ-প্ৰধানমন্ত্ৰী তথা প্ৰতিৰক্ষা মন্ত্ৰী ৰিচাৰ্ড মাৰ্লেছকো প্ৰতিৰক্ষা মন্ত্ৰী ৰাজনাথ সিঙে সাক্ষাৎ কৰে । অষ্ট্ৰেলিয়াৰ কেনবেৰাৰ সংসদ ভৱনত অষ্ট্ৰেলিয়াৰ উপ-প্ৰধানমন্ত্ৰী তথা প্ৰতিৰক্ষা মন্ত্ৰী ৰিচাৰ্ড মাৰ্লেছ আৰু দুয়োপক্ষৰ জ্যেষ্ঠ প্ৰতিৰক্ষা বিষয়াৰ সৈতে প্ৰতিৰক্ষা মন্ত্ৰী ৰাজনাথ সিঙে বৈঠকত মিলিত হয় । পৰৱৰ্তী সময়ত অষ্ট্ৰেলিয়াৰ প্ৰধানমন্ত্ৰী এণ্টনি আলবানিছেও এই বৈঠকত যোগদান কৰে ।
লগতে পঢ়ক : দুদিনীয়া ভ্ৰমণসূচীৰে অষ্ট্ৰেলিয়াত উপস্থিত ৰাজনাথ সিং
