হিন্দু ধৰ্মত শ্ৰীমদ্ভাগৱত গীতাৰ অতি গুৰুত্ব আছে । এই গ্ৰন্থক হিন্দু ধৰ্মৰ আটাইতকৈ গুৰুত্বপূৰ্ণ শাস্ত্ৰ বুলি গণ্য কৰা হয় । হিন্দু বৰ্যপঞ্জী অনুসৰি প্ৰতি বছৰে মাৰ্গশীৰ্ষ মাহৰ শুক্ল পক্ষৰ দশম দিনা গীতা জয়ন্তী পালন কৰা হয় ।
উল্লেখ্য যে এইবাৰ গীতা জয়ন্তী উৎসৱ ১১ ডিচেম্বৰ ২০২৪ তাৰিখ বুধবাৰে পালন কৰা হৈছে । এই দিনটোতো মোক্ষদা একাদশীৰ ব্ৰতো পালন কৰা হয় । মহাভাৰত যুদ্ধৰ সময়ত যিদিনা ভগৱান শ্ৰীকৃষ্ণই অৰ্জুনক উপদেশ দিছিল, সেইদিনাও মাৰ্গশীৰ্ষ শুক্ল পক্ষৰ একাদশী তাৰিখ আছিল ।
সেয়ে এই দিনটোত মোক্ষদা একাদশী হয় আৰু যিহেতু ভগৱান শ্ৰীকৃষ্ণই এই দিনটোত গীতাৰ উপদেশ দিছিল, সেয়েহে এই দিনটো ভাগৱত গীতাৰ জন্ম বা জন্ম বাৰ্ষিকী হিচাপে পালন কৰা হয় ।
শ্ৰীমদ্ভাগৱত গীতাৰ গুৰুত্ব-
ভাগৱত গীতা কেৱল এখন ধৰ্মীয় গ্ৰন্থ নহয় । বৰঞ্চ গীতাৰ শিক্ষাত জীৱন-ধাৰণৰ পদ্ধতি, ধৰ্ম পালন আৰু কৰ্মৰ ওপৰত গুৰুত্ব দিয়া হৈছে । লগতে ইয়াত কৃষ্ণই এনে শিক্ষা দিছে, যিয়ে ঈশ্বৰ, আত্মা আৰু সৃষ্টিৰ নিয়মৰ জ্ঞান স্পষ্ট কৰে । ইয়াত কৰ্ম, ধৰ্ম, মোক্ষ আদি বিষয়ৰ কথা কোৱা হৈছে । যিসকলে ভাগৱত গীতা পাঠ কৰে, তেওঁলোকৰ আত্মবিশ্বাস বাঢ়ে, তেওঁলোক সাহসী আৰু নিৰ্ভীক হৈ সদায় কৰ্তব্যৰ পথত আগবাঢ়ি যায় ।
‘গীতা’ একমাত্ৰ গ্ৰন্থ যাৰ জন্ম বাৰ্ষিকী পালন কৰা হয়-
বিশ্বৰ বিভিন্ন ধৰ্মৰ নিজস্ব ধৰ্মীয় গ্ৰন্থ আছে । হিন্দু ধৰ্মতো বহুতো ধৰ্মীয় গ্ৰন্থ আছে । কিন্তু গীতা পৃথিৱীৰ একমাত্ৰ গ্ৰন্থ যাৰ জন্ম বাৰ্ষিকী পালন কৰা হয় । ইয়াৰ কাৰণ হ’ল গীতা এনে এখন গ্ৰন্থ যিখন শ্ৰীকৃষ্ণৰ মুখৰ পৰা জন্ম হৈছিল । গীতাত উল্লেখ কৰা প্ৰতিটো শ্লোক ভগৱান শ্ৰীকৃষ্ণৰ মুখৰ পৰা আহিছে । সেয়েহে ইয়াৰ জন্ম বাৰ্ষিকী পালন কৰা হয় ।
