ডি আৰ ডি অ’ৰ মিলিটেৰী কম্বেট পেৰাচুট চিষ্টেম
প্ৰতিৰক্ষা ক্ষেত্ৰত ভাৰতে আন এক বৃহৎ সফলতা অৰ্জন কৰিছে । ৩২ হাজাৰ ফুট উচ্চতাৰ পৰা সফলতাৰে পৰীক্ষা কৰা হয় ডি আৰ ডি অ’ৰ দ্বাৰা নিৰ্মিত থলুৱা মিলিটেৰী কম্বেট পেৰাচুট চিষ্টেমৰ । ভাৰতীয় বায়ুসেনাৰ সাহসী সৈন্যই এই উচ্চতাৰ পৰা ফ্ৰীফল জাম্প কৰি পেৰাচুট ব্যৱস্থাৰ শক্তি আৰু নিৰ্ভৰযোগ্য ডিজাইন প্ৰদৰ্শন কৰে । ২৫,০০০ ফুটতকৈ অধিক উচ্চতাত ব্যৱহাৰ কৰিব পৰা ভাৰতৰ এইটোৱেই প্ৰথম পেৰাচুট চিষ্টেম ।
এই ব্যৱস্থাটো ডি আৰ ডি অ’ৰ দুটা পৰীক্ষাগাৰ, আগ্ৰাৰ এৰিয়েল ডেলিভাৰী ৰিচাৰ্চ এণ্ড ডেভেলপমেণ্ট এষ্টাব্লিছমেণ্ট আৰু বেংগালুৰুৰ ডিফেন্স বায়’ইঞ্জিনিয়াৰিং এণ্ড ইলেক্ট্ৰ’মেডিকেল লেবৰেটৰীয়ে যৌথভাৱে প্ৰস্তুত কৰিছে । পেৰাচুটত কম গতিৰে অৱতৰণ ক্ষমতা, উন্নত দিশ নিয়ন্ত্ৰণ, আৰু NavIC সংহতিৰ দৰে নতুন প্ৰযুক্তি সন্নিবিষ্ট কৰা হৈছে, যাৰ ফলত সৈনিকসকলে যিকোনো পৰিস্থিতিত নিখুঁত অৱতৰণ কৰিব পাৰে ।
এই ব্যৱস্থাৰ প্ৰৱৰ্তনৰ লগে লগে ভাৰতে আৰু বিদেশী পেৰাচুট ব্যৱস্থাৰ ওপৰত নিৰ্ভৰ কৰিব নালাগে । দেশৰ ভিতৰতে ইয়াৰ ৰক্ষণাবেক্ষণ দ্ৰুত আৰু সহজ হ’ব, যাৰ ফলত যুদ্ধ বা সংকটৰ সময়ত ইয়াৰ সম্পূৰ্ণ কাৰ্যকৰী ক্ষমতা নিশ্চিত হ’ব ।
এই সফলতাৰ বাবে প্ৰতিৰক্ষা মন্ত্ৰী ৰাজনাথ সিঙে ডি আৰ ডি অ’, বায়ুসেনা, আৰু উদ্যোগক অভিনন্দন জনায় । তেওঁ কয় যে এই কৃতিত্ব ভাৰতৰ থলুৱা প্ৰতিৰক্ষা প্ৰযুক্তিৰ ক্ষেত্ৰত এক বৃহৎ পদক্ষেপ ।
লগতে পঢ়ক : ২০৪০ চনৰ ভিতৰত চন্দ্ৰলৈ মানুহ প্ৰেৰণ কৰিব ভাৰতে; ISRO ৰ ডাঙৰ সিদ্ধান্ত
