আমেৰিকাৰ ৰাষ্ট্ৰপতি ডনাল্ড ট্ৰাম্পে নতুন শুল্ক নীতি ৰূপায়ণৰ কথা ঘোষণা কৰাৰ পিছত চীনে তীব্ৰ প্ৰতিক্ৰিয়া প্ৰকাশ কৰিছে।
চীনে স্পষ্ট কৰি দিছে যে যদি আমেৰিকা যুক্তৰাষ্ট্ৰই বাণিজ্য যুদ্ধ আৰম্ভ কৰাৰ সিদ্ধান্ত লয়, তেন্তে চীনে এই সংঘৰ্ষত দৃঢ়তাৰে থিয় দিব।
আমেৰিকা যুক্তৰাষ্ট্ৰত চীনৰ দূতাবাসে ইয়াৰ বিবৃতিত কয়, “যদি আমেৰিকাই যুদ্ধ বিচাৰে, সেয়া শুল্ক যুদ্ধ, বাণিজ্য যুদ্ধ বা আন যিকোনো ধৰণৰ অৰ্থনৈতিক যুদ্ধ নহওঁক কিয়, আমি ইয়াৰ বাবে সম্পূৰ্ণৰূপে প্ৰস্তুত আৰু শেষলৈকে যুঁজ দি যাম।”
এই বিবৃতিটো তেতিয়া আহিছিল যেতিয়া ডনাল্ড ট্ৰাম্পে চীন, ভাৰত আৰু অন্যান্য দেশৰ বিৰুদ্ধে ২ এপ্ৰিলৰ পৰা শুল্ক আৰোপ কৰাৰ কথা ঘোষণা কৰিছিল।
আমেৰিকা যুক্তৰাষ্ট্ৰৰ কংগ্ৰেছক সম্বোধন কৰি ট্ৰাম্পে কয় যে কেইবা দশক ধৰি ভাৰত, চীন, ব্ৰাজিল, মেক্সিকো আৰু ইউৰোপকে ধৰি বহুতো দেশে আমেৰিকাৰ বিৰুদ্ধে উচ্চ শুল্ক আৰোপ কৰিছে, যিটো অনুচিত।
ট্ৰাম্পৰ মতে, আমেৰিকাই এতিয়া সঁহাৰি দিব আৰু আমেৰিকান সামগ্ৰীৰ ওপৰত অধিক শুল্ক আৰোপ কৰা দেশবোৰৰ ওপৰত শুল্ক আৰোপ কৰিব।
ট্ৰাম্পে লগতে কয় যে “আন দেশবোৰে দীৰ্ঘদিন ধৰি আমাক অৰ্থনৈতিকভাৱে আঘাত কৰি আহিছে। এতিয়া আমাৰ তেওঁলোকৰ সৈতে যুঁজ দিয়াৰ পালা”।
তেওঁ এইটোও অভিযোগ কৰিছিল যে কেইবাখনো দেশে আমেৰিকাৰ বাণিজ্যক দুৰ্বল কৰিবলৈ শুল্কৰ অপব্যৱহাৰ কৰিছে।
চীনে ট্ৰাম্পৰ নীতিৰ প্ৰতি তীব্ৰ প্ৰতিক্ৰিয়া ব্যক্ত কৰে আৰু কয় যে যদি আমেৰিকা যুক্তৰাষ্ট্ৰই এই সংঘৰ্ষ বৃদ্ধি কৰিবলৈ সংকল্পবদ্ধ হয়, চীনেও শেষলৈকে এই সংঘৰ্ষৰ বিৰুদ্ধে যুঁজিবলৈ প্ৰস্তুত।
চীনেও ইংগিত দিছিল যে সিদ্ধান্তটোৱে বিশ্বব্যাপী বাণিজ্যত প্ৰভাৱ পেলাব পাৰে আৰু অৰ্থনৈতিক অস্থিৰতা বৃদ্ধি কৰিব পাৰে।
আমেৰিকা যুক্তৰাষ্ট্ৰ আৰু চীনৰ মাজত বাণিজ্যিক সম্পৰ্কত ইতিমধ্যে উত্তেজনা আছিল, কিন্তু ট্ৰাম্পৰ এই নতুন সিদ্ধান্তই দুয়োখন দেশৰ মাজত উত্তেজনা আৰু বৃদ্ধি কৰিব পাৰে।
আগন্তুক সময়ত, এই বাণিজ্য যুদ্ধৰ প্ৰভাৱ কেৱল আমেৰিকা যুক্তৰাষ্ট্ৰ আৰু চীনৰ ওপৰতেই নহয়, সমগ্ৰ বিশ্ব অৰ্থনীতিৰ ওপৰতহে দেখা যাব পাৰে।
