এইবাৰ ব্ৰাজিলত উপস্থিত হৈছে প্ৰধানমন্ত্ৰী নৰেন্দ্ৰ মোদী । জি-২০ শীৰ্ষ সন্মিলনত অংশগ্ৰহণৰ বাবে ব্ৰাজিলৰ ৰিঅ’ ডি জেনেৰিঅ’ত উপস্থিত হৈছে প্ৰধানমন্ত্ৰী মোদী, য’ত তেওঁক সংস্কৃত মন্ত্ৰোচ্চাৰণেৰে আদৰণি জনোৱা হয় । এই সন্মিলনত বহু নেতাক লগ পোৱাৰ আশা কৰা বুলি কয় প্ৰধানমন্ত্ৰী মোদীয়ে ।
প্ৰধানমন্ত্ৰী মোদীৰ ব্ৰাজিল ভ্ৰমণৰ মাজতে এতিয়া চৰ্চা চলিছে যে ভাৰত আৰু ব্ৰাজিলৰ সম্পৰ্ক কিমান গভীৰ আৰু ভাৰত আৰু ব্ৰাজিলে ইখনে সিখনৰ লগত ব্যৱসায় কৰিলে কোন লাভান্বিত হয় ।
ভাৰতে ব্ৰাজিলৰ পৰা কি আমদানি কৰে ?
দুয়োখন দেশৰ মাজত সুসম্পৰ্কৰ মূল ভিত্তি হৈছে ব্যৱসায় । সাধাৰণতে দেখা গৈছে যে যেতিয়া দুখন দেশৰ মাজত ভাল ব্যৱসায় হয় তেতিয়া তেওঁলোকৰ সম্পৰ্কত বিভাজনৰ সম্ভাৱনা অতি কম থাকে । যদিও ভাৰতে ব্ৰাজিলৰ পৰা বহু বস্তু আমদানি কৰে, কিন্তু ইয়াত কিছুমান বস্তু আটাইতকৈ গুৰুত্বপূৰ্ণ । ইয়াৰ ভিতৰত খাৰুৱা তেল, সৰিয়হ তেল, সোণ, কেঁচা চেনি, এছবেষ্টছ, তামৰ অক্সাইড, লোহা অক্সাইড, মেংগানিজ, কিডনী বিন, গোমটল, ভালভ, মটৰ পাম্প ইত্যাদি ।
ভাৰতৰ পৰা ব্ৰাজিলে কি আমদানি কৰে ?
ভাৰতৰ পৰা ব্ৰাজিলে আমদানি কৰা সামগ্ৰীসমূহৰ ভিতৰত জৈৱিক ৰাসায়নিক পদাৰ্থ, ডিজেল, ঔষধ আৰু ৰাসায়নিক পদাৰ্থ, অটো উপাদান আৰু যান্ত্ৰিক আৰু বৈদ্যুতিক সঁজুলিকে ধৰি অভিযান্ত্ৰিক সামগ্ৰী, পোছাক আৰু বস্ত্ৰজাত সামগ্ৰী, লোহা আৰু তীখা (আৰু সামগ্ৰী), প্লাষ্টিক, চিৰামিক আদি অন্তৰ্ভুক্ত আছে ।
বিশ্বব্যাপী মঞ্চত একেলগে কাম কৰে-
ভাৰত আৰু ব্ৰাজিলৰ মাজত সম্পৰ্ক স্থাপন হোৱাৰ ৭৬ বছৰ হ’ল । দুয়োখন দেশে একেলগে বহুতো আন্তঃৰাষ্ট্ৰীয় মঞ্চত কাম কৰে, য’ত BRICS, IBSA, G4, G20, BASIC আদি মঞ্চ অন্তৰ্ভুক্ত আছে । যোৱা কেইবছৰমানৰ পৰা দুয়োখন দেশৰ মাজত বাণিজ্য আৰু বিনিয়োগ বৃদ্ধি পাইছে । জৈৱ শক্তিৰ দৰে গুৰুত্বপূৰ্ণ ক্ষেত্ৰতো দুয়োখন দেশে সহযোগিতা আগবঢ়াইছে ।
দুয়োখন দেশৰ মাজত ব্যৱসায়িক পৰিস্থিতি-
২০০৮ চনত দুয়োখন দেশৰ মাজত বাণিজ্য ৪.৬৬ বিলিয়ন মাৰ্কিন ডলাৰ আছিল, যিটো ২০১৪ চনলৈকে ১১.৪২ বিলিয়ন ডলাৰত উপনীত হৈছিল । কিন্তু কেন্দ্ৰত মোদী চৰকাৰৰ কাৰ্যকালত ২০২২ চনৰ ভিতৰত ভাৰত আৰু ব্ৰাজিলৰ মাজত বাণিজ্য ১৫.২০ বিলিয়ন ডলাৰত উপনীত হৈছিল । দুয়োখন দেশৰ মাজত ব্যৱসায় হ’লে ভাৰতৰ পৰা ৰপ্তানিৰ সংখ্যা অধিক হৈয়েই থাকে ।
